Մինչև սեքս-սկանդալը սարքելը` երեք անգամ մուտք են գործել իմ ֆեյսբուքյան էջ. Թոքմաջյան

Տեղեկացրել էինք, որ պոլիտեխնիկի ռեկտորի ժամանակավոր պաշտոնակատար Հովհաննես Թոքմաջյանը հրապարակել է տեսանյութ` իր անվան հետ կապված սեքս-սկանդալի գործով: Նա նշեց, որ բավական երկար էր մտածում` հրապարակե՞լ տեսանյութը, թե՞ ոչ, բայց որոշել է հրապարակել` մի շարք հարցերի պատասխաններ վերջնական ճշտելու համար:

«Երեք անգամ են մտել իմ ֆեյսբուքյան էջ: «Սոլո» սրճարանից է եղել իմ ֆեյսբուքյան էջ առաջին մուտքը: Հավանաբար, փորձել են կոմպրոմիս գտնել, բայց չի ստացվել, և դուրս են եկել: Երկրորդ անգամ էլ մտել, և տեքստն են ստեղծել այդ սկանդալի, իսկ երրորդ անգամ մտել են իմ էջ և տեղադրել այն «զրույցը», որը հայտնի է բոլորին»,- ասաց Թոքմաջյանը` հավելելով, որ տարբեր սրճարաններից են մտել իր ֆեյսբուքյան էջ` հույս ունենալով, որ տարածքում տեսախցիկներ չկան:

Ըստ նրա` մամուլում այս ընթացքում 200-ից ավելի հրապարակումներ են եղել պոլիտեխնիկի մասին, 200-ն էլ` բացասական:

Հարցին, թե, իր պնդմամբ, սարքած սեքս-սկանդալը ինչո՞ւ են կյանքի կոչել, Թոքմաջյանը պատասխանեց, թե այդ մասին ոչինչ չի ասի, թեև ինքն ունի դրա պատասխանը: «Այդ պատասխանը ես իմ ներսում ունեմ, սակայն այսօր ոչինչ չեմ ասի»,- ասաց նա: