Մենք ձեւականորեն ցուցակին ենք ձայն տալիս. Հովհաննես Թոքմաջյան

«Մենք ձեւականորեն ցուցակին ենք ձայն տալիս, ես էլ երրորդ համարն եմ, բայց իրականում դա այդպես չէ, մենք ձայն ենք տալիս Տարոն Մարգարյանին»,- նախընտրական քարոզարշավի շրջանակներում Նուբարաշեն համայնքի բնակիչների հետ հանդիպման ժամանակ հայտարարեց ՀՊՃՇՀ ռեկտոր Հովհաննես Թոքմաջյանը:

Նա հայտարարեց, որ քաղաքական ընտրություններն ավարտվել են, հիմա պետք է ընտրել Երեւանի քաղաքապետ: Թոքմաջյանը վստահեցրեց, որ Տարոն Մարգարյանը «երկու ոտքով, իր ամբողջ տոհմածառով այս ժողովրդից է սերվել եւ կանգնած է այս հողի վրա, եւ միայն այն, որ 35 տարեկանում 5 երեխայի հայր է, պետք է ընտրել նրան»:

Թոքմաջյանը պատմեց, որ Տարոն Մարգարյանի հոր`Անդրանիկ Մարգարյանի հետ ընկերներ են եղել, եւ վստահեցրեց, որ վերջին 40-50 տարվա ընթացքում քչերն են եղել, որ ժողովրդի մոտ ունեցել են այնպիսի հեղինակություն, ինչպիսին ունեցել է Անդրանիկ Մարգարյանը: «Տարոն Մարգարյանը, ինչպեսեւ իր լուսահոգի հայրը, սիրում է ժողովրդին, ժողովրդի մի մասն է»,- հայտարարեց նա:

Թոքմաջյանը նշեց նաեւ, որ պարտավոր է կանգնել Տարոն Մարգարյանի կողքին եւ իր ամբողջ հեղինակությունը օգտագործել, որպեսզի Երեւանն ունենա այնպիսի քաղաքապետ, «ինչպիսին մեր երիտասարդ, փորձառու, քաղաքական կամք ունեցող, ազնիվ եւ բարի Տարոն Մարգարյանն է»: