Թուրքիայում այրել են քրդամետ կուսակցականներին տեղափոխող ավտոբուսի վարորդին

Թուրքիայում այրել են քրդամետ Ժողովուրդների դեմոկրատական կուսակցության առաջնորդ Սելահաթթին Դեմիրթաշի նախընտրական հանրահավաքին մասնակցելու համար կուսակցության անդամներին Թեքման շրջանից Էրզրում (հայկական Կարին) տեղափոխող ավտոբուսի վարորդին. տեղեկացնում է Demokrathaber-ը:

Ցուցարարները հարձակվել են ավտոբուսի վրա, ծեծել կուսակցության անդամներին, ապա` այրել ավտոբուսի վարորդին: Վիրավորին տեղափոխել են հիվանդանոց, նա գտնվում է վերակենդանացման բաժանմունքում:

Հայտնի է դարձել, որ 40-ամյա վարորդն ամուսնացած է, ունի 8 երեխա:

Կատարվածի մասին հայտարարությամբ հանդես է եկել կուսակցականներից մեկը: Նա շեշտել է, որ դեպքը տեղի է ունեցել ոստիկանների աչքի առաջ: Նրա խոսքով՝ ցուցարարները նախ երկաթներով հարձակվել են ավտոբուսի վրա, որից հետո բենզին լցրել ու այրել այն: Ցուցարարներն այրել են նաև քրդամետ կուսակցության առաջնորդ Դեմիրթաշի լուսանկարներով պաստառներն ու կուսակցության դրոշները:

Ակնհայտ է, որ քրդական կուսակցության վրա կատաղի հարձակումների թիվն զգալիորեն կրկնապատկվեց այն բանից հետո, երբ Թուրքիայի ազգային փոքրամասնությունները, այդ թվում՝ հայերը, խորհրդարանական ընտրություններում հայտնեցին իրենց աջակցությունը  քրդական կուսակցությանը: