Պաշտոնյան կարկամեց, երբ վարչապետը հարցրեց նախագահականի ապարատի հետ կապված խնդրի մասին

Կառավարության այսօրվա նիստում օրենսդրության կարգավորման ազգային կենտրոնի տնօրեն Արմեն Եղիազարյանը ներկայացրեց «Բնակավայրերի տարածքների գոտևորման նախագծերի մշակման, փորձաքննության, համաձայնեցման, հաստատման և փոփոխման կարգը հաստատելու մասին» որոշումը:

Ըստ այդմ` ավագանու կողմից առաջադրանքին հավանություն չտրվելու դեպքում համայնքի ղեկավարը, մերժման հիմքերը վերացնելուց հետո (եթե հնարավոր է դրանք վերացնել), տասը աշխատանքային օրվա ընթացքում առաջադրանքը կրկին ներկայացնում է ավագանու քննարկմանը` սույն կետով սահմանված կարգով: Նշված ժամկետում առաջադրանքը կրկին չներկայացնելու դեպքում առաջադրանքը համարվում է հավանության չարժանացած: Բացասական եզրակացության դեպքում մարզպետը առաջադրանքը հետ է ուղարկում համայնքի ղեկավարին: Համայնքի ղեկավարը թերությունները ուղղելու հնարավորության դեպքում, հինգ աշխատանքային օրվա ընթացքում, ուղղում է դրանք և առաջադրանքը կրկին ներկայացնում մարզպետին: Նշված ժամկետում առաջադրանքը կրկին չներկայացնելու դեպքում այն համարվում է չհաստատված:

Եղիազարյանը խնդրեց երկու օր ժամանակ տալ` այս փոփոխության` ուժ մեջ մտնելու համար:

Վարչապետ Հովիկ Աբրահամյանը դժգոհեց` հիշեցնելով, որ ավելի վաղ էլ ասել է, եթե կան իրավական հարցեր` որոշումների հետ կապված, ապա պետք չէ դրանք մտցնել կառավարության օրակարգ: «Այդպես էինք, չէ՞, պայմանավորվել այն օրը»,- վարչապետը դիմեց կառավարության աշխատակազմի ղեկավար-նախարար Դավիթ Հարությունյանին:

Հարությունյանը պատասխանեց, որ ինքը տեղյակ չէ, որ իրավական հարց է առաջացել նախագահականի ապարատի հետ:

Եղիազարյանն արդարացավ` ասելով, որ վերջին պահին է առաջացել այդ իրավական հարցը ու չի հասցրել զգուշացրել:

Դավիթ Հարությունյանը պատասխանեց. «Նման դեպքերում մենք պետք է տեղյակ լինենք, մեզ պետք է զգուշացնեք»:

Վարչապետը կրկին հարց ուղղեց Եղիազարյանին, թե նախագահական ապարատի հետ կապված ինչպե՞ս է ծագել խնդիրը: Եղիազարյանը ոչինչ չկարողացավ պատասխանել: