Առաջնագծում ծառայող սպաների ու ենթասպաների համար կսահմանվի բարձր թոշակ

Կառավարության վաղվա նիստում պաշտպանության նախարար Սեյրան Օհանյանը ներկայացնելու է «Պետական կենսաթոշակների մասին» օրենքում  լրացում կատարելու մասին հարցը, որով առաջարկվում է առավել բարձր թոշակ սահմանել հակառակորդի հետ շփման գծում զինվորական ծառայություն իրականացնող սպաների ու ենթասպաների համար:

Օրենքի նախագծի ընդունման անհրաժեշտությունը պայմանավորված է այն հանգամանքով, որ առաջնագծում մարտական հերթապահություն իրականացնող` ՀՀ  ԶՈւ  սպայական, ենթասպայական և պայմանագրային շարքային կազմի զինծառայողների համար ՀՀ օրենսդրությամբ սահմանված չեն համարժեք  և  նշանակալի արտոնություններ:

Առաջարկվող օրենսդրական փոփոխությունը, լինելով հասցեական` ուղղված լինելով զինծառայողների կոնկրետ խմբի համար լրացուցիչ արտոնություններ սահմանելուն, խթանիչ ուժ կհանդիսանա մարտական հերթապահություն իրականացնող զորամասերը սպայական, ենթասպայական և պայմանագրային շարքային կազմի զինծառայողներով համալրման գործընթացը արդյունավետ կազմակերպելու համար, որով մեկ անգամ ևս կբարձրանա Հայաստանի Հանրապետության անվտանգությանը, պաշտպանությանը և տարածքային ամբողջականությանը, նրա սահմանների անձեռնմխլիությանը ուղղված, ՀՀ օրենսդրությամբ սահմանված, Հայաստանի Հանրապետության զինված ուժերի գործընթացի որակը:

Օրենքի նախագծի ընդունումը կնպաստի նաև մարտական հերթապահություն իրականացնող զորամասերում պայմանագրային հիմունքներով շարքային կազմի զինծառայողներով համալրման գործընթացի արդյունավետ կազմակերպմանը: