Վենետիկի հանձնաժողովը հավանություն է տվել սահմանադրական բարեփոխումներին. Գագիկ Հարությունյան

Վենետիկի հանձնաժողովը, որի կազմում 59 երկիր է ներգրավված,  իր լիագումար նիստում հավանություն է տվել սահմանադրական բարեփոխումներին: Այս մասին այսօր լրագրողների հետ զրույցում հայտնեց ՍԴ նախագահ, սահմանադրական բարեփոխումների մասնագիտական հանձնաժողովի նախագահ Գագիկ Հարությունյանը:

Նրա խոսքով` մայիսի 18-ին հանձնաժողովի 7 փորձագետներ իրենց գրավոր կարծիքներն էին ներկայացրել ներկայացված նախագծի վերաբերյալ: «Մենք կարողացանք հոդված առ հոդված քննարկման առարկա դարձնել նախագիծը: Վենետիկի հանձնաժողովի փորձագետները որոշակիորեն տպավորված են նախագծով, բայց որոշակի նկատառումներ ունեն, որոնք վերաբերում են բացարձակ իրավունքների հետ կապված որոշակի ամրագրումների»,- ասաց Հարությունյանը և հավելեց, որ առանձին հոդվածների վերաբերյալ հարցադրումները կքննարկեն առաջիկա օրերին:

Գագիկ Հարությունյանը տեղեկացրեց, որ հավանաբար ամսվա վերջին  հանրությունը կտեղեկանա Վենետիկի հանձնաժողովի դիտողություններին: ՍԴ նախագահը նաև հայտնեց, որ հունիսի սկզբից մինչև 12-ը մտադիր են հանդիպումներ կազմակերպել այն քաղաքական ուժերի հետ, որոնք նկատառումներ են ներկայացրել: Ըստ նրա` 17 կուսակցություն նկատառումներ է ներկայացրել: