Գևորգ Կոստանյանն ամենայն պատասխանատվությամբ հայտարարում է, որ չկան կոռումպացված դատախազներ ու անպատժելիության մթնոլորտ

Այսօր ԱԺ հերթական քառօրյայում քննարկվում է գլխավոր դատախազության` 2014-ի տարեկան հաշվետվությունը:

ՀՀ գլխավոր դատախազ Գևորգ Կոստանյանը կարևորեց այն հանգամանքը, որ հաշվետվությունը ներկայացվում է Ազգային ժողովում: Նա նշեց, որ երբ ստանձնում էր գլխավոր դատախազի պաշտոնը, խոստացել էր գործել երեք առաջնահերթությունների շրջանակում, այն է՝ դատական համակարգում կոռուպցիայի և ոչ պրոֆեսիոնալ գործունեության վերացում, դատախազների քաղաքական չեզոքության պահպանում և անպատժելիության մթնոլորտի վերացում:

«Ոչ պրոֆեսիոնալ և կոռումպացված դատախազը չարիք է, քանի որ դրա արդյունքում խեղվում են մարդկային ճակատագրեր: Ամենայն պատասխանատվությամբ հայտարարում եմ, որ չի եղել ու չի կարող լինել այնպիսի դեպք, որ որևէ դատախազ դրսևորի կոռուպցիոն վարքագիծ, մնա անպատիժ ու շարունակի պաշտոնավարել համակարգում»,- ասաց Գևորգ Կոստանյանը՝ ևս մեկ անգամ կրկնելով, որ դրա մասին հայտարարում է ամենայն պատասխանատվությամբ: