Քննիչը դատի է տվել դատախազին

Yerkir.am-ի տեղեկություններով՝ Շիրակի մարզային քննչական վարչության ավագ քննիչը դիմել է դատարան՝ բողոքելով հսկող դատախազի՝ իրեն՝ վարույթից հեռացնելու որոշման դեմ: Այս գործն ուշագրավ է այնքանով, որ նախկինում նման նախադեպ չի եղել:

Նշենք, որ քննիչը հեռացվել է Շիրակի մարզի Ողջի գյուղի բնակչի կողմից զգալի չափերի գողություն կատարելու դեպքի առթիվ հարուցված քրեaկան գործով դատավարությանը մասնակցելուց:

Հաշվի առնելով այն հանգամանքը, որ ՀՀ քրեական դատավարության օրենսգրքով ուղղակիորեն չի կարգավորում դատախազի որոշումները վերադաս դատախազին բողոքարկելու իրավական ընթացակարգ, քննիչը ՀՀ քր. դատ. օր.-ի 290-րդ հոդվածի կարգով առարկել է վերադաս դատախազի որոշման դեմ: Սակայն այս տարվա ապրիլի 30-ին ՀՀ գլխավոր դատախազության հետաքննության և նախաքննության օրինականության նկատմամբ հսկողության վարչության պետ Ա.Հարությունյանը պատասխանել է, որ ՀՀ քրեական դատավարության օրենսդրությամբ` դատախազի որոշումը բողոքարկման ենթակա չէ:

Քննիչը համարում է, որ, իրեն քրեական դատավարությանը մասնակցելուց հեռացնելով, խախտել են իր իրավունքներն ու օրինական շահերը: Դատախազը քննիչին վարույթից հեռացնելու որոշման մեջ նկարագրել է մի շարք առերևույթ դատավարական խախտումներ, ըստ էության` քննիչին մեղսագրվել են իրավախախտումներ` կասկածի տակ դնելով նրա մասնագիտական բարեխղճությունը:

Ըստ քննիչի՝ իրեն վարույթից հեռացնելով և դատավարական առերևույթ խախտումներ վերագրելով` խախտվում են իր՝ որպես քաղաքացու, սահմանադրական իրավունքները, մասնավորապես` անմեղության կանխավարկածն ու արդյունավետ պաշտպանության իրավունքը: