Եկեք` մենք էլ մեզ վրա վերցնենք հայ ժողովրդի ցավը. Արսեն Ավակով

Ուկրաինայի ներքին գործերի նախարար, ազգությամբ հայ Արսեն Ավակովը  ֆեյսբուքյան իր էջում անդրադարձել է Հայոց ցեղասպանության 100-ամյա տարելիցին՝ գրառումը վերնագրելով «Ցավդ տանեմ»:

«Եվրոպան հիշում է 1,5  միլիոն սպանվածների, կտտանքների ենթարկվածների, սովից մահացածների հիշատակը, որոնց՝ սպանողների առջև միակ մեղքը «սխալ» ազգությունն էր և «սխալ» հավատը: Դա մանրակրկիտ ծրագրված և իրականացված ոճրագործություն էր, որը տևեց 2 տասնամյակ:

Հայերի ցեղասպանությունը մեկ ազգի ողբերգություն չէ: Դա ահավոր և, ցավոք, չսերտված դաս է համայն մարդկության համար: Ոչ մի երկիր և ոչ մի պետություն ապահովագրված չէ ողբերգության կրկնությունից: ՄԱԿ-ի կողմից ընդունված  վերջին ցեղասպանությունը իրականացվել է բոլորովին վերջերս` 1995-ին:

Այդ պատճառով այսքան կարևոր է պետական մակարդակով ճանաչել հայ ժողովրդի Ցեղասպանությունը: Գոնե 100 տարի հետո դատապարտել հանցագործությունը:

Ուկրաինան նվաճել է դեպի Եվրամիություն ճանապարհը հարյուրավոր մարդկանց արյամբ: Զոհվածներից առաջինը Սերգեյ Նիգոյանն էր: Երկրի Արևելքում Ուկրաինայի համար պայքարում  կամավորական ջոկատներում գլուխ են խոնարհել նաև Ուկրաինայի հայերը: Նրանք 52-ն են:

Հայտնի ուկրաինացի գրող Լինա Կոստենկոն գրել է մի չքնաղ բանաստեղծություն՝ «Цавет Tanem», ինչը նշանակում է «քո ցավն ինձ վրա եմ վերցնում»: Եկեք` մենք էլ մեզ վրա վերցնենք հայ ժողովրդի ցավը: Այսօր Ուկրաինայի խորհրդարանը մեկ րոպե լռությամբ հարգել է Հայոց ցեղասպանության զոհերի հիշատակը...»:

Ամբողջական գրառումը՝ այստեղ: