ԵԽԽՎ շուրջ 200 պատգամավոր ստորագրել է Հայոց ցեղասպանությունը դատապարտող հայտարարությունը

ԵԽԽՎ-ում հայաստանյան պատվիրակության անդամ Արմեն Ռուստամյանը Yerkir.am-ի հետ զրույցում ասաց, որ քիչ առաջ Եվրոպայի խորհրդի Խորհրդարանական վեհաժողովի քարտուղարություն է հանձնվել Հայոց և մնացյալ ցեղասպանությունները դատապարտող, Հայոց ցեղասպանությունը ճանաչելու կոչ անող հայտարարության տեքստը: Նա նշեց, որ ԵԽԽՎ շուրջ 200 պատգամավոր ստորագրել է այդ հայտարարությունը: Պատգամավորների շրջանում ստորագրահավաքը շարունակվում է:

Panorama.am-ի հաղորդմամբ` հայտարարության տեքստում ասվում է. «Ցեղասպանությունը հանդուրժողականության սկզբունքների եւ մարդու իրավունքների ու ազատությունների հիման վրա ստեղծված հասարակության համար աներեւակայելի հանցագործություն է: Նման հանցագործությունների կանխարգելումը վստահորեն կարող է կանգնեցնել հակամարտությունների, ողբերգությունների եւ հումանիտար աղետների ծավալումը: Հայոց ցեղասպանության` հստակ եւ ժամանակին չդատապարտվելը զգալիորեն հանգեցրել է մարդկության դեմ հետագա հանցագործությունների` Հոլոքոստի եւ այլ ցեղասպանությունների կանխման տապալմանը:

2015 թվականի ապրիլի 24-ին լրանում է Հայոց ցեղասպանության 100-րդ տարելիցը: Օսմանյան կայսրությունում իրագործված այդ սարսափելի հանցագործության արդյունքում զոհվեց 1,5 մլն հայ»:

Փաստաթուղթը ստորագրած պատգամավորները այդպիսով հարգանքի տուրք են մատուցել անմեղ զոհերի հիշատակին, դատապարտել մարդկության դեմ բոլոր հանցագործությունները, ցեղասպանությունները` ցավով նշելով դրանց ժխտման բոլոր փորձերը:

«Ցեղասպանությունների եւ մարդկության դեմ հանցագործությունների կանխումը պետք է լինի մեր առաջնահերթություններից մեկը»,- ասվում է հայտարարության մեջ եւ շեշտվում, որ Եվրոպայի խորհուրդը կարեւոր դեր պետք է ունենա այդ ուղղությամբ միջազգային ջանքերին աջակցության գործում:

«ԵԽ-ն պետք է կոչ անի իր կազմում ընդգրկված պետություններին` հաշտվել սեփական անցյալի հետ եւ հող նախապատրաստել ժողովուրդների հետագա հաշտեցման համար»,- ասվում է հայտարարության մեջ: