Էրդողանը դարձյալ նախապայմաններ է առաջադրում եւ հիշեցնում Թուրքիայում բնակվող հայերի մասին

Թուրքիայի նախագահ Թայիփ Էրդողանը Քոջաելի քաղաքում կայացած հանրահավաքի ժամանակ իր ելույթում անդրադարձել է Հայոց ցեղասպանությանը եւ  հայ-թուրքական հարաբերություններին:

«Հայաստանի համար մեր դուռը դեռ բաց է, եթե, այսպես կոչված, ցեղասպանության կամ Արցախի բռնազավթման հարցում դրական քայլեր լինեն, ապա պատրաստ ենք ցանկացած տիպի համագործակցության: Պատրաստ ենք բանակցել հայ քաղաքական գործիչների, Հայաստանի իշխանությունների հետ: Սակայն դրանից առաջ պետք է լուծվի Արցախի հարցը»,- հայտարարել է Թուրքիայի նախագահը, տեղեկացնում է թուրքական «Անադոլուն»:

Էրդողանը «աշխարհի բոլոր հայերին» կոչ է արել հրաժարվել Ցեղասպանության ճանաչման համար մղվող պայքարից. «Այս հարցը  ամբողջովին կտրվել է պատմական արմատներից և քաղաքականացվել է: Այս ամենից էլ ամենաշատը հայերն են տուժում: Գիտենք, որ նման որոշումներ կայացնողների հիմնական նպատակը հայերի իրավունքների պաշտպանությունը չէ»:

Թուրքիայի նախագահը հերթակա անգամ հիշատակել է Թուքրիայում ապրող եւ աշխատող հայերին: «Հայաստանից փախած և մեր երկրում հյուրընկալված հայեր կան: Մենք նրանց դեմ որևէ բան արե՞լ ենք: Մենք նրանց հյուրընկալել ենք, այնպես չէ՞…»,-ասել  է Էրդողանը: