Արդարադատության նախարարի համար հասկանալի չէ Քիմի այցելության ժամանակ առաջացած աժիոտաժը

Այսօր լրագրողները արդարադատության նախարար Հովհաննես Մանուկյանին հարցրել են, թե ինչպես կազդի արդարադատության համակարգի վրա Քիմ Քարդաշյանի այցը Հայաստան: Նախարարը նախ նշեց, որ գնահատում է լրագրողների հումորի զգացումը, հետո ասաց, որ իր համար անհասկանալի էր այդ աժիոտաժը, որը դրսևորվեց հասարակության տարբեր շերտերի կողմից: Այդ առումով կարող է արձանագրել, որ նախ` հասարակության մեջ կա հանդուրժողականության պակաս, նաև` հայ հասարակությունը սուր էմոցիոնալությամբ է ընդունում ամեն ինչ:

«Կարելի է որոշ բաներ մի քիչ ավելի հանգիստ ընդունել: Ընդհանուր առմամբ, որևէ աստղի այցելությունը Հայաստան դա արդեն դրական է, հատկապես` եթե այդ այցելությունները Հայոց ցեղասպանության 100-ամյա տարելիցի  կոնտեքստում են, որովհետև դա լրացուցիչ լիցք հաղորդեց, որ աշխարհը ևս մեկ անգամ հիշի Հայոց ցեղասպանության մասին: Անկեղծ ասած` չեմ հասկանում այն մարդկանց, ովքեր արհեստական աժիոտաժներ են ստեղծում հանրահայտ մարդու` Հայաստան այցելության շուրջ»,- ասաց նախարարը` հավելելով, որ վատ չէ, որ էկոնոմիկայի նախարարությունը ակտիվորեն զբաղվել է Քիմ Քարդաշյանի ընդունելության կազմակերպման հարցով: