Աշխարհահռչակ տիկին է, պետք է հպարտ լինենք. Գալուստ Սահակյանը՝ Քիմ Քարդաշյանի մասին

Այսօր լրագրողները ԱԺ նախագահ Գալուստ Սահակյանին հարցրեցին, թե ինքն ընդունելություն կկազմակերպի՞ Քիմ Քարդաշյանի համար: Գալուստ Սահակյանը նախ շփոթվեց և ասաց. «Ես տեղյակ չեմ»:

Լրագրողները տեղեկացրեցին, որ ներկա պահին Քիմ Քարդաշյանը ընդունեության է հանրապետության վարչապետ Հովիկ Աբրահամյանի մոտ: «Նման բան իմ օրակարգում չկա»,- ասաց Գալուստ Սահակյանը, ապա հավելեց. «Քիմ Քարդաշյանը ամբողջ աշխարհում հայտնի տիկին է, և մենք հպարտ պետք է լինենք, որ ամբողջ աշխարհի ուշադրությունը նրա միջոցով Հայաստանի վրա է: Մենք սիրում ենք ամենալավ բանի մասին բամբասել, քարկոծել: Աշխարհահռչակ տիկին է, և կարծում եմ` մենք արժանապատիվ պետք է նրան ընդունենք»:

Հարցին, թե արդյո՞ք Քիմ Քարդաշյանն ավելի շատ բան չի անում, քան Հայաստանի ԱԳՆ-ն, պատասխանեց. «Այդպես չի կարելի ասել, համենայն դեպս, աշխարհահռչակ հայերը, օրինակ` Շառլ Ազնավուրը, իրենց ճանաչելիությամբ նպաստում են մեր ժողովրդի հետագա բարեփոխումներին»:

Լրագրողներից մեկը հարցրեց. «Գեղեցի՞կ կին է Քիմ Քարդաշյանը»: Գալուստ Սահակյանը նախ զայրացավ այդ հարցից, հետո պատասխանեց. «Ինձ համար բոլոր կանայք էլ գեղեցիկ են»: