ԱԺ-ին ներկայացվեց Սադախլո-Բագրատաշեն անցակետի տարածքում կամուրջ կառուցելու մասին որոշումը

Այսօր ԱԺ ֆինանսավարկային հարցերի մշտական հանձնաժողովում ՀՀ տրանսպորտի և կապի նախարարի առաջին տեղակալ Արթուր Առաքելյանը ներկայացրեց ՀՀ կառավարության եւ Վրաստանի կառավարության միջեւ 2014 թվականի դեկտեմբերի 24-ին Երեւանում ստորագրված` «Հայաստանի Հանրապետության եւ Վրաստանի պետական սահմանի Սադախլո-Բագրատաշեն անցման կետի տարածքում Դեբեդ գետի վրա նոր կամրջի կառուցման վերաբերյալ» համաձայնագիրը:

Նա նշեց, որ կամուրջը կառուցվելու է սահմանային անցակետերի արդիականացման շրջանակներում, որը նպատակ ունի լուծել մաքսային ծառայությունների առջև ծառացած խնդիրները:

Վրացական կողմի հետ պայմանավորվել են, որ ՀՀ կառավարությունը ֆինանսավորելու է կամրջի կառուցման բացառապես այն հատվածը, որն ընկած է ՀՀ սահմանից ներս: Պետք է երկու երկրների քաղաքաշինական նորմերի հետ համաձայնեցնեն այդ որոշումը, իսկ շինարարի ընտրությունը կկատարվի երկու երկրների համատեղ հանձնաժողովի միջոցով:

Կամրջի շինարարության վրա ծախսվելու է 5 միլիոն եվրո: