Թույլ կազմով Բաքու մեկնելն աններելի է. սամբոյի ֆեդերացիայի նախագահ

Արդեն հայտնել ենք, որ ՀԱՕԿ-ը որոշել է մասնակցել Բաքվում կայանալիք Եվրոպական խաղերին: Այս առիթով Yerkir.am-ը զրուցեց ԽՍՀՄ սպորտի պատվավոր վարպետ, Հայաստանի վաստակավոր մարզիչ, համամիութենական կարգի մրցավար, միջազգային կարգի էքստրա դասի մրցավար, Հայաստանի սամբոյի ֆեդերացիայի նախագահ Լևոն Հայրապետյանի հետ:

«Շատ ուրախ ու երջանիկ ենք, որ սամբոն նույնպես ընդգրկվել է այն մարզաձևերի շարքում, որոնք պետք է Հայաստանը ներկայացնեն Բաքվի Եվրոպական խաղերում: Պատրաստվում ենք մեկնել Բաքու ուժեղագույն կազմով: Թույլ կազմով ներկայանալը Բաքվի մրցաշարին, ուղղակի աններելի է, և յուրաքանչյուր մարզաձևում պարտավոր ենք մեր ուժեղագույն կազմով ներկայանալ»,- նշեց նա:

Խոսելով անվտանգության մասին` Հայրապետյանն ասաց. «Եթե անվտանգության երաշխիքներ չլինեն, ապա ՀԱՕԿ-ը նման որոշում չէր ընդունի»:

Իսկ դիտարկմանը, թե կկարողանա՞ն մարզիկներն իրենց լավագույն կողմերով հանդես գալ նման բարոյահոգեբանական բարդ իրավիճակում, պատասխանեց. «Ես չեմ ընդունում այդ տեսակետը: Զարմանում եմ, որ կան մարզաշխարհի ներկայացուցիչներ, ովքեր կամքից այդքան թույլ են: Դեմ եմ նման խոսակցություններին: Եթե ՀԱՕԿ-ը որոշել է, որ պետք է մասնակցենք, ուրեմն մենք պարտավոր ենք ուժեղագույն կազմով մեկնել Բաքու և ամեն ինչ անել` հաղթանակի հասնելու համար: Սա է իմ տեսակետը»: