ՀՀԿ-ական Սամվել Ֆարմանյանին թվում է, թե բոլոր ընդդիմախոսներն անգրագետ են

Այսօր ԱԺ քառօրյայում քննարկվում էր «Ժառանգություն» խմբակցության պատգամավոր Զարուհի Փոստանջյանի որոշման նախագիծը օրակարգում ընդգրկելու հարցը: Որոշման նախագիծը Պերմյակովին հայ իրավապահներին փոխանցելու մասին է:

Զարուհի Փոստանջյանը նշեց, որ եթե հարցին նայում ենք իրավաբանական տեսանկյունից, ապա այն խոստումը և պարտավորությունը, որը ստանձնեց ՀՀ գխավոր դատախազ Գևորգ Կոստանյանը, մինչ այժմ չի կատարել:

«Մենք մինչ այժմ չգիտենք՝ նա դիմե՞լ է Ռուսաստանին և պատասխան ստացել է, թե՞ ոչ: Այդ ինչպե՞ս է լինում, որ իմ նամակին պատասխան է գալիս, որտեղ հստակ նշվում է, որ իրենք չեն պատրաստվում Պերմյակովին փոխանցել Հայաստանին»,- ասաց Զարուհի Փոստանջյանը:

ՀՀԿ խմբակցության պատգամավոր Սամվել Ֆարմանյանը նշեց. «ՀՀ գլխավոր դատախազին ուղղված պատասխանի համար ժամկետներ նախատեսված չեն: Սա փաստ է, և բոլոր, այդ թվում` մասնավոր իրավաբանական բուհում կրթություն ստացողը պետք է իմանար սրա մասին: Սա իսկապես անթույլատրելի է, որ շահարկում ենք այս մեծ ողբերգությունը»:

Զարուհի Փոստանջյանը արձագանքեց. «Ինձանից այս կողմ նստած երկու երիտասարդները արդեն քանի անգամ է փորձում են անձնական վիրավորանքների անցնել: Անկախ այն փաստից, թե դուք քանի կուսակցություն եք փոխել և դեռ քանիսն եք պատրաստվում փոխել, միևնույն է, չեք կարող կաշկանդել ինձ»:

Սամվել Ֆարմանյանը կրկին փորձեց հակադարձել. «Կան մարդիկ, որոնք ավելի հաճելի են իրենց տանը, քան տանից դուրս, մասնագիտական առումով` թերեւս մեր որոշ գործընկերներ պետք է տեղյակ լինեն նվազագույնի մասին, որ գլխավոր դատախազը հանդես է գալիս ՀՀ անունից, և որքան էլ պատգամավորները նամակով դիմեն, չեն կարող հանդես գալ ՀՀ անունից, սա շատ կարևոր տարբերություն է, իսկ միջպետական համաձայնագրերը չեն նախատեսում նամակի պատասխանի ժամկետներ: Անթույլատրելի է անգրագիտությունը»:

Սկսվեց լեզվակռիվ Զարուհի Փոստանջյանի ու Սամվել Ֆարմանյանի միջև, որին միջամտեց Էդուարդ Շարմազանովը: «Սա շուկա չէ, նիստը վարող ունի»,- ասաց նա: