Տիկին Փոստանջյանի ներկայացրածն անգրագետ նախագիծ է. Սամվել Ֆարմանյան

Այսօր ԱԺ արտաքին հարաբերությունների հանձնաժողովում քննարկվեց «Ժառանգություն» խմբակցության պատգամավոր Զարուհի Փոստանջյանի նախագիծը՝  «Թուրքիայի Հանրապետության կողմից հայրենի բնօրրանի՝ Հայաստանի տարածքների բռնազավթումը և հայ ժողովրդի Մեծ հայրենազրկումը դատապարտելու մասին»: Սույն նախագծով պատգամավորը պահանջվում է Թուրքիայից վերադարձնել մեր պատմական հայրենիքի տարածքները:

ՀՀԿ-ական պատգամավոր Սամվել Ֆարմանյանն առաջարկել էր նախագիծը քննարկել հանձնաժողովում փակ ռեժիմով, ինչին ընդդիմացել էր նախագծի հեղինակը, սակայն հետո համաձայնել էր նախագծի քննարկումը փակ ռեժիմով անցկացնելուն:

Yerkir.am-ի հետ զրույցում Սամվել Ֆարմանյանը նշեց, որ փակ քննարկման պատճառն այն էր, որ փաստաթղթում առկա էին այնպիսի ձևակերպումներ, որոնք պարզապես անկարելի է հրապարակային դարձնել:

«Տիկին Փոստանջյանի հեղինակածը պարզապես անգրագետ նախագիծ է: Նրա ձևակերպումներն այնպիսին են, որ կարող են որպես զենք օգտագործվել մեր արևմտյան հարևանների կողմից: Մենք քննարկման ժամանակ հարգարժան տիկին Փոստանջյանին բոլոր փաստարկները ներակայացրել ենք,  և Փոստանջյանը համաձայնեց հետ կանչել իր նախաձեռնությունը, և մենք շատ բարձր տրամադրությամբ ավարտեցինք մեր չորսժամյա նիստը: Նա համաձայնեց, որ նախագիծը չդրվի քվեարկության և հետաձգվի»,- հայտնեց Ֆարմանյանը: