Զոհված տղաներից մեկը Արցախից էր` ընտանիքի միակ արու զավակը

Երեկ Գյուլիստանի ուղղությամբ տեղակայված դիրքերի վրա հակառակորդի հատուկ նշանակության ջոկատի հարձակումը կանխելիս զոհված`  ՊԲ զինծառայող, 19-ամյա շարքային Հակոբ Խաչատրյանը Արցախի Քաշաթաղի շրջանի Աղաձոր գյուղից էր: Yerkir.am-ի տեղեկություններով` Հակոբն ընտանիքի միակ արու զավակն էր` երկու քրոջ եղբայր:

Մեր տեղեկություններով` Հակոբը բանակ է զորակոչվել 2014-ի հունիսին: Նա սովորում էր Երևանի Խաչատուր Աբովյանի անվան պետական մանկավարժական համալսարանի պատմության ֆակուլտետի առաջին կուրսում:

Աղաձորի գյուղապետ Մկրտիչ Հարությունյանը yerkir.am-ի հետ զրույցում հայտնեց, որ Հակոբը գյուղատնտեսությամբ զբաղվող, աշխատող ընտանիքից էր: «Այգի են մշակում, անասուն են պահում, սովորական ապրող ընտանիք է»,- ասաց նա: Գյուղապեռի խոսքով` Հակոբն աչքի է ընկել իր ֆիզիկական կարողություններով, մրցանակ է ստացել աթլետիկայի շրջանային մրցումներում և այլն: «Ֆիզիկապես ուժեղ տղամարդ էր, մարդասեր, ընկերասեր, չափից ավելի նվիրված ծնողներին, չէր ուզում, որ հերն ու մերը շատ տանջվեն, միշտ օգնում էր նրանց»,- ասաց նա և հավելեց, որ Հակոբը երբեք չի տրտնջացել ծառայությունից, սիրում էր հայրենիքը, բանակը:

Գյուղապետը հայտնեց, որ Ստեփանակերտից զինվորի դին արդեն բերում են Աղաձոր: