Թուրքիայի մեջլիսում Հայոց ցեղասպանությանը առերեսվելու կոչ է արվել

Մարտի 18-ին Չանաքքալեի 100-ամյակի և զոհերի հիշատակման օրվա կապակցությամբ Թուրքիայի Ազգային Մեծ ժողովում տեղի ունեցած հատուկ նիստում բացման խոսքով հանդես է եկել խորհրդարանի խոսնակ Ջեմիլ Չիչեքը, ապա հաջորդել են քաղաքական ուժերի ելույթները:

Ըստ Milliyet-ի՝ քրդամետ Ժողովուրդների դեմոկրատական կուսակցության պատգամավոր Լևենթ Թյուզելի՝ հայերի վերաբերյալ հայտարարությունները վրդովմունք են առաջացրել մյուս պատգամավորների շրջանում:

«Մեր հայ համերկրացիները՝ Անատոլիայի մարդիկ, Չանաքքալեում կռվելիս լավն էին, սակայն նույն թվականին, միաժամանակ,Ստամբուլից աքսորում էին հայ մտավորականներին: Եթե տեր ենք կանգնում Չանաքքալեի մեր ժառանգությանը, ուրեմն մարտի դաշտում կռվող հայերի, աքսորվածների, ցեղասպանության ենթարկված հայերի իրողությանն էլ պետք է առերեսվենք, Հրանտի նման թանկ մտավորականի սպանության պատճառ դարձած մեր քաղաքականությունն էլ պետք է քննության ենթարկենք»,- ասել է Թյուզելը:

Ի պատասխան ելույթ է ունեցել ազգայնամոլների կուսակցության պատգամավոր Յուսուֆ Հալաչօղլուը: «Պատմությանն առերեսվելը դժվար բան է: Եթե բոլորն առերեսվեն պատմությանը, մեծ օգուտ կբերի: Կուզեի իմանալ՝ հայերը պատմությանը որքանո՞վ են առերեսվել»,- ասել է նա:

Պատգամավորի խոսքով՝  այն ժամանակ, երբ Չանաքքալեում թուրքերը գոյության պայքար էին մղում, Վանում ու Զեյթունում հայերն ապստամբում ու թուրքերին էին կոտորում: