Ի՞նչ է, պետք է 100 տարի սպասեինք, որ հենց Ցեղասպանության օ՞րն արտահայտվեինք. Սերժ Ավետիքյան

Տեղեկացրել էինք, որ նախօրեին «Նարեկացի» արվեստի միությունում տեղի է ունեցել ֆրանսահայ կինոռեժիսոր և դերասան Սերժ Ավետիքյանի հանդիպումը հանդիսատեսի հետ: Հանդիպման շրջանակներում ցուցադրվել է նրա` 2010-ին նկարահանած «Շնապատում» անիմացիոն ֆիլմը, որի ցուցադրությունը նվիրված էր Ցեղասպանության 100-րդ տարելիցին:

Ավետիքյանը, խոսելով Ցեղասպանության 100-րդ տարելիցի շրջանակներում իրականացվող նախագծերի, նկարահանվող ֆիլմերի մասին, նշեց, որ անողն անում է իր գործը` ոչ մի կլոր տարեթվերի չսպասելով և դրանց մեջ չսահմանափակվելով:

«Ապրիլի 24-ով ոչինչ չի վերջանում, ոչինչ չի լուծվում: Շարունակել է պետք, աշխատել, անդրադառնալ, որ մեզնից հետո եկողներն էլ մեր գործը շարունակեն: Ի՞նչ է, պետք է 100 տարի սպասեինք, որ հենց Ցեղասպանության օ՞րն արտահայտվեինք: Ոչ, կարծում եմ` արտահայտվել ուզողն արտահայտվում է` այդ տարեթվերին չնայելով»,- ասաց Ավետիքյանը: