Մեծ պապս Կիլիկիայում ֆրանսիական բանակի կազմում կռվել է թուրքերի դեմ

Աղբյուրը՝ armeniangenocide100

Ռուբեն Սաքապետոյանի պատմությունը

Ադանա

13-ամյա Նարե Սաքապետոյանը ArmenianGenocide100.org-ում ներկայացրել է իր հոր տատիկի և պապիկի պատմությունը, ովքեր ծագումով Կիլիկիայի Ադանա քաղաքից են: Ռուբեն պապը եղել է հայկական լեգեոնի սպա և ֆրանսիական բանակի կազմում կռվել է թուրքերի դեմ:

«Հայրիկիս տատը և պապը ծագումով Կիլիկիայի Ադանա քաղաքից էին: Մեր մեծ Ռուբեն պապը, որի անունով կոչել են նաև իմ պապին, եղել է հայկական լեգեոնի սպա և ֆրանսիական բանակի կազմում կռվել է թուրքերի դեմ: Կիլիկիան հայաթափվել է երկու անգամ:

Առաջին անգամ արտաքսվելուց հետո հայերը վերադարձել են և Միհրան Տամատյանի գլխավորությամբ հռչակել Կիլիկիայի Անկախ Հանրապետությունը, որը, ցավոք, գոյություն է ունեցել ընդամենը 24 ժամ: Ֆրանսիացիների հեռանալուց հետո մեր նախնիները վերջնականապես լքել են Կիլիկիայի տարածքը…

Այնուհետև գաղթի երկար ու ձիգ ճամփաներ, որից հետո իմ մեծ տատը` Հայկուհին, հայտնվել է Սիրիայի Դամասկոս քաղաքում, իսկ մեծ պապս՝ կորցրել ծնողներին: Միայն տարիներ անց է նրա հայրը գտել իրեն Կիպրոսի որբանոցներից մեկում, իսկ մայրն ու փոքր քույրը զոհ են գնացել թուրքական յաթաղանին: Ի վերջո, իմ մեծ տատն ու պապը իրար են հանդիպել Լիբանանի Բեյրութ քաղաքում և ամուսնացել` սկիզբ տալով գերդաստանի մի նոր ճյուղի: 1946 թվականին նրանք ներգաղթել են Խորհրդային Հայաստան»: