Էդ կուսակցությունը վերջացավ, մենք էլ դուրս եկանք. նախկին ԲՀԿ-ական գյուղապետերի բացատրությունները

Հայտնի է, որ Կոտայքի` երկու տասնյակից ավելի համայնքապետեր մեկ օրվա ընթացքում դուրս են եկել ԲՀԿ-ից: Yerkir.am-ը փորձել է պարզել, թե ինչո՞ւ են նրանք այդպիսի որոշում կայացրել և արդյո՞ք անդամագրվելու են այլ կուսակցության:

Հատիս համայնքի ղեկավար Սամվել Գարսևանյանը նշեց, որ չունի որոշում` այլ կուսակցությանը անդամագրվելու հետ կապված: Մեր հարցին, թե ինչո՞վ էր պայմանավորված ԲՀԿ-ից նրա դուրս գալը, պատասխանեց. «Ոչ մի բանով, ուղղակի ուզում եմ անկախ մարդ դառնալ, համայնքի անկախ ղեկավար դառնալ»:

Զովք համայնքի ղեկավար Նորիկ Գևորգյանը նշեց, որ դեռ չի որոշել այլ կուսակցության անդամագրվել, նույնիսկ` չի մտածել այդ ուղղությամբ: Մեր հարցին, թե ինչո՞վ էր պայմանավորված ԲՀԿ-ից դուրս գալը, պատասխանեց. «Որ բոլորը դուրս եկան, ինչո՞վ էր պայմանավորված: Վերջացավ էդ կուսակցությունը, մենք էլ դուրս եկանք»:

Ջրվեժ համայնքի ղեկավար Ռոբերտ Պետրոսյանը խուսափեց հարցերին պատասխանել` ասելով. «Ես էս պահին շատ զբաղված եմ, իսկ ուրիշ կուսակցության անդամագրվելու ցանկություն չունեմ»:

Հացավան համայնքի ղեկավար Շավարշ Սարգսյանը նշեց. «Ես էդ հարցին չեմ կարող պատասխանել: Իմ ցանկությամբ եմ ԲՀԿ-ից դուրս եկել, չեմ ուզեցել մնալ, և վերջ: Այլ կուսակցության չեմ անդամագրվելու»: Հարցին` արդյոք ԲՀԿ-ից դուրս գալը կապված էր Գագիկ Ծառուկյանի շուրջ տեղի ունեցած վերջին իրադարձությունների հետ, պատասխանեց. «Իհարկե, այո»: Ճշտող հարցին` իսկ ի՞նչ կատարվեց իրականում, Շավարշ Սարգսյանը պատասխանեց. «Չեմ կարող ասել, տեղյակ չեմ, բացարձակ չենք իմանում` ինչ ա կատարվել»:

Գառնի համայնքի ղեկավար Աշոտ Վարդանյանն ավելի ագրեսիվ էր. «Նման հարցերի ես չեմ պատասխանի, եկեք ստեղ, տեղում պատասխանեմ»:

Նշենք, որ համայնքապետերից շատերը պարզապես անջատում էին հեռախոսը` իմանալով, որ լրագրող է զանգահարել, կամ բոլոր հնարավոր միջոցներով խուսափում էին երկխոսության մեջ մտնել: