Մոսկվայի կենտրոնում սպանել են հայտնի ռուս ընդդիմադիր Բորիս Նեմցովին

Ուրբաթ գիշերը Մոսկվայի կենտրոնում սպանել են ընդդիմադիր քաղաքական գործիչ Բորիս Նեմցովին։ Այդ մասին հաղորդում է «Ինտերֆաքս» գործակալությունը:

Գրոհն իրականացրել է մեկ մարդ, ով դուրս է եկել սպիտակ մեքենայից և թիկունքից չորսից֊յոթ գնդակ արձակել Նեմցովի վրա այն պահին, երբ ընդդիմադիր գործիչը, մի երիտասարդ կնոջ ընկերակցությամբ, անցնում էր Բոլշոյ Զամոսկվորեցկի կամրջով։

Սպանությունը տեղի է ունեցել Մոսկվայի ժամանակով ժամը 23:40-ի սահմաններում։  

Ռուսաստանյան «lifenews.ru»-ի հաղորդմամբ` Բորիս Նեմցովի սպանության ականատես է դարձել Ուկրաինայի 23-ամյա քաղաքացի, մոդել Աննա Դուրիցկայան, որի հետ Նեմցովը մոտ հարաբերություններ է ունեցել:

Բորիս Նեմցովի սպանության փաստով Ռուսաստանի քննչական կոմիտեի Մոսկվա քաղաքի գլխավոր քննչական վարչության կողմից քրեական գործ է հարուցվել Քրեական օրենսգրքի՝  «սպանություն» և «զենքի ապօրինի շրջանառություն» հոդվածներով:

Պետության ղեկավար Վլադիմիր Պուտինը ցավակցություն է հայտնել զոհվածի ընտանիքին և հայտարարել, որ Բորիս Նեմցովի սպանությունը խիստ սադրիչ բնույթի պատվերով սպանության հատկանիշներ ունի:

Բորիս Նեմցովը ընդդիմադիր քաղաքական գործիչ էր, անխնա քննադատում էր Վլադիմիր Պուտինի վարած քաղաքականությունը, հատկապես` Ուկրաինայի հետ կապված: