Արագած Ախոյանը «գործարար-պատգամավոր» արտահայտությունն անգամ օրենքի խախտում է համարում

Նախկին ԲՀԿ-ական Արագած Ախոյանը Yerkir.am –ի հետ զրույցում, նշեց, որ ինքը տեղյակ չէ այն նորություններին, թե ԱԺ ԲՀԿ խմբակցությունից դուրս եկած պատգամավորները քննարկո՞ւմ են  խորհրդարանական խումբ (գործարար- պատգամավորներից կազմված) ձևավորելու հարցը։

Տեղեկացնենք, որ երեկ ԱԺ պատգամավոր Ռուստամ Գասպարյանը «Հայկական ժամանակ»-ի հետ զրույցում հաստատել էր այն տեղեկությունը, թե ԱԺ ԲՀԿ խմբակցությունից դուրս եկած պատգամավորները քննարկում են խորհրդարանական խումբ ձեւավորելու հարցը։

«Գործարար-պատգամավորների խումբ չի կարող լինել, որովհետև Սահմանադրության կոպիտ խախտում է հենց «գործարար-պատգամավոր» արտահայտությունը»,- նշեց  Արագած Ախոյանը:

Մեր դիտարկմանը, թե երրորդ գումարման խորհրդարանում, ըստ էության, նման բան եղել է, պատգամավորը պատասխանեց. «Էն ժամանակ եղել է, հիմա չի կարող լինել: Ես նման ինֆորմացիայի չեմ տիրապետում»:

Ուշագրավ է, որ ԱԺ պատգամավոր, միաժամանակ գործարար Արագած Ախոյանը մեզ հավաստիացրեց, որ եթե անգամ խորհրդարանում գործարար-պատգամավորների խումբ ձևավորվի, ինքը չի համալրի նրանց շարքերը:

Տեղեկացնենք, որ, համաձայն ԱԺ կանոնակարգ-օրենքի 15 հոդվածի, առնվազն 10 պատգամավոր կարող է ստեղծել պատգամավորական խումբ՝ Ազգային ժողովի նախագահին ներկայացնելով խմբի ստեղծման մասին`  իրենց ստորագրած հայտարարությունը: