«Ստրանջա»-ի մրցաշար. Հայաստանը ներկայացնող 7 բռնցքամարտիկ կպայքարեն կիսաեզրափակիչի ուղեգրի համար

Բուլղարիայի մայրաքաղաք Սոֆիայում շարունակվում է բռնցքամարտի «Ստրանջա»-ի 66-րդ միջազգային մրցաշարը, որտեղ Հայաստանը ներկայացված է 10-ը բռնցքամարտիկով:

Երեկ ռինգ դուրս եկած մեր 6 բռնցքամարտիկներից 4-ը հաղթեցին իրենց մրցակիցներին: Իր 2-րդ անընդմեջ հաղթանակը տոնեց 69 կգ քաշային Վլադիմիր Մարգարյանը, ով, կրկին մրցելով Բուլղարիան ներկայացնող մարզիկի հետ, ոչ մի հնարավորություն չտվեց մրցակցին: Վստահ հաղթանակ տոնեց նաև 49 կգ քաշային Արթուր Հովհաննիսյանը, ով առավելության հասավ իռլանդացի Իրվին Բրանդանի նկատմամբ: Մրցավարների միաձայն որոշմամբ` հաղթանակ տոնեց նաև 60 կգ քաշային Սամվել Բարսեղյանը, ում մրցակիցը պանամացի Ժաիմ Մունոզն էր: Իր առաջին մենամարտում հաղթանակ տոնեց  75 կգ քաշային՝ մրցաշրջան 2014-ի Հայաստանի լավագույն մարզիկ Արման Հովհիկյանը, ով պարտության մատնեց Բուլղարիան ներկայացնող Անտոն Դմիտրովին:  64 կգ քաշային կարգում հանդես եկող Հովհաննես Բաչկովն ու 81 կգ քաշային կարգում ելույթ ունեցող Նարեկ Մանասյանը պարտություն կրեցին: Հովհաննես Բաչկովը զիջեց Լորենցո Ստոմայորին, իսկ Նարեկ Մանասյանը՝ Ռադոսլավ Պանտալևին:

Այսօր «Ստրանջա»-ի մրցաշարում կկայանան ¼ եզրափակիչի մենամարտերը: Հայաստանը ներկայացնող  10 բռնցքամարտիկներից 7-ը կպայքարեն կիսաեզրափակիչի ուղեգրի և, միևնույն ժամանակ, մեդալի համար: 49 կգ քաշային Արթուր Հովհաննիսյանը կմենամարտի Մեծ Բրիտանիան ներկայացնող Ժոզեպ Մապոշ Ձիկամանիի հետ: 52 կգ քաշային Կորյուն Սողոմոնյանի մրցակիցը կրկին անգլիացի Ջեք Բատեսոնն է, ով այս քաշային կարգի Անգլիայի ուժեղագույն մարզիկն է: 56 կգ քաշային Հենրիկ Մոքոյանը կիսաեզրափակիչի ուղեգիրը կվիճարկի ղազախ Զաբոլատ Տիլեգենուլի հետ: 60 կգ քաշային Սամվել Բարսեղյանի մրցակիցը Չեխիան ներկայացնող մեր հայրենակից Էրիկ Ագատելյանն է: 69 կգ քաշային Վլադիմիր Մարգարյանը այս մրցաշարի իր 3-րդ մենամարտում կփորձի հաղթահարել Ուզբեկստանը ներկայացնող Իսրայիլ Մադրիմովի արգելքը: 75 կգ քաշային Արման Հովհիկյանը կմենամարտի ուկրաինացի Վալերի Խարլամովի հետ, իսկ 91 կգ քաշային Հենրիկ Սարգսյանի մրցակիցը կլինի բուլղարացի Քրիստիան Դմիտրովը: Այդ մասին տեղեկացնում է Հայաստանի բռնցքամարտի ֆեդերացիայի մամուլի ծառայությունը: