Հանուն ո՞ր պետության է կայացվում դատավճիռը

Գյումրու սպանդի վերաբերյալ խորհրդարանական քննարկումների ժամանակ ՀՅԴ խմբակցության պատգամավոր Արծվիկ Մինասյանը հարց ուղղեց գլխավոր դատախազ Գևորգ Կոստանյանին:

Նա նշեց, որ լայնորեն քննարկվող թեմաներից մեկը այն է, որ համաձայնագրերը մեկնաբանվում են տարակերպ` թե' ռուսական, թե' հայկական դաշտում: Ըստ պատգամավորի` համաձայնագիրը հնարավորություն է տալիս ստեղծելու աշխատանքային խումբ, արդյո՞ք քննարկվել է այդ հնարավորությունը:

«Ի՞նչ սխեմաներ եք պատրաստում, որ հասարակության մտահոգություններն ու ենթադրությունները չդառնան համոզմունք, որի արդյունքում կվարկաբեկվի ամբողջ գործընթացը` սկսած հանձնման հարցից, վերջացրած ապագա դատավարություններով: Եվ հանուն ո՞ր պետության է կայացվում դատավճիռը այս ոճրագործության մասով»,- հարցրեց պատգամավորը:

Գևորգ Կոստանյանը պատասխանեց, որ պայմանագրերի տարբեր մեկնաբանման հետ կապված ինքը ո'չ խնդիր է տեսնում, ո'չ էլ նման փաստ: Իսկ մնացած հարցերին գլխավոր դատախազը պատասխանեց բարդ, անհասկանալի և ոչ հստակ: