Ընկերները խաղալիք են փաթեթավորել եւ պատգամավորի տուն ուղարկել

Yerkir.am-ի հումորային բլից հարցերին պատասխանում է ԱԺ պատգամավոր Հովհաննես Սահակյանը:

-Ամանորին, Ամանորի գիշերը շա՞տ խմեցիք:

-Խմելը երբեք շատ չի լինում:

 -Քանի՞ բաժակից եք հարբում:

-Ընդհանրապես, բաժակից չեն հարբում:

-Ի՞նչն է օգնում դուրս գալ խումարից:

-Երբեք չեմ փորձել դուրս գալ, որովհետեւ երբեք չեմ եղել:

-Ամենաուրախ, ամենահիշվող Նոր տարին:

-2007 թվականին 12-ը նշելուց հետո մինչեւ առավոտ քեֆ ենք արել, առատ ձյուն էր:

-Իսկ ամենատխուրը:

-Տխուր Նոր տարի չի լինում:

-Ամենաթանկ ամանորյա նվերը (գումարի առումով), որ ստացել եք:

-Գումար (ծիծաղում է): Թանկ կոստյում եմ ստացել:

-Ամենաօրիգինալ նվերը:

-Ընկերներս խաղալիք էին փաթեթավորել եւ մեր տուն ուղարկել:

-Տոնը ստացված է, երբ...

-Երբ Ձմեռ պապը Ձյունանուշի հետ է գալիս:

-Առանց ինչի՞ չեք պատկերացնում Ամանորի սեղանը:

-Առանց դատարկ բաժակների:

-Ձեր հանդիպած ամենատպավորիչ Ձյունանուշը:

-Սպիտակում եմ հանդիպել, կանաչաչյա…

-Ձյունանուշն առանց Ձմեռ պապի, ինչպես …

-Ինչպես ուռին ու բարդին:

-Ձմեռ պապ լինելու բախտին երբեւէ արժանացե՞լ եք:

-Այո, տղայիս հետ որպես Ձմեռ պապ եմ խոսել, որ իմանամ` ինչ է ուզում:

-Զոքանչի համար ի՞նչ գնեցիք:

-Չի լսվում, ի՞նչ ասացիք (ծիծաղում է):

-Ամանորյա գնումներից հետո, մինչեւ հաջորդ աշխատավարձը, գրպանում գումար մնա՞ց:

-Այո, ամառային պիջակի գրպանում:

-Հետևեցի՞ք, թե ով որքան կերավ Ձեր՝ Նոր տարվա սեղանից:

-Անշուշտ (ծիծաղում է):

-Ամանորի սեղան գցելու գործում Ձեր բաժինը…

-Ամենագլխավորը` սեղանն եմ դրել կենտրոնում:

-Եղա՞ն մարդիկ, որ մտքում հաշվեցին Ձեր ամանորյա սեղանի արժեքը:

-Չեմ կարծում, որ արժեքը միանգամից երեւում է:

-Միջինը քանի՞ բոնբոներկա եք նվիրում հյուր գնալիս:

-Բոնբոներկան փոխել ենք ծաղկեփնջով:

- Ձեզ նվեր բերված բոնբոներկան քանի՞ անգամ եք ուրիշին նվեր տարել:

-Նվազագույնը՝ հինգ անգամ:

-Ինչպե՞ս կարելի է ապրել մարդավարի, եթե յուրաքանչյուր տարի որևէ կենդանու տարի է:

-Մարդու պես:

-Ոչխարից, այծից (այս տարի այդ կենդանակերպի տարին է) ի՞նչ ակնկալիքներ ունեք:

-Որ պոզերը չցցի: