Հարցաքննվել է «Ազատություն» ռադիոկայանի Բաքվի գրասենյակի 20 աշխատակից

Ադրբեջանի ծանր հանցագործությունների քննչական վարչությունը կիրակի օրը հարցաքննել է «Ազատություն» ռադիոկայանի Բաքվի գրասենյակի շուրջ 20 աշխատակցի: Նրանց բոլորին ազատ են արձակել միայն քննության գաղտնիքը չբացահայտելու վերաբերյալ ստորագրություն վերցնելուց հետո. հայտնում է contact.az-ը։ 

«Ընդհանուր առմամբ, լրագրողներին հարցեր են տվել՝ կապված նրանց մասնագիտական գործունեության հետ»,- ասված է հաղորդագրության մեջ:

Միևնույն ժամանակ, ռադիոկայանի աշխատակիցների իրավունքները պաշտպանող փաստաբան Յալչին Իմանովին թույլ չեն տվել շարունակել այդ գործը: Պատճառն այն է, որ, գլխավոր դատախազի առաջին տեղակալի որոշմամբ, Իմանովը գործում ներգրավվել է որպես վկա:

Փաստաբանը նշել է, որ ռադիոկայանում իրականացված խուզարկությունը որևէ իրավաբանական կապ չունի ոչ կառավարական կազմակերպությունների դեմ քրեական գործի հետ:

Հիշեցնենք, որ «Ազատություն» ռադիոկայանի ադրբեջանական ծառայության նկատմամբ` որպես օտարերկրյա ֆինանսավորում ունեցող կազմակերպություն, հետաքննություն է իրականացվում: