«Ազատություն» ռադիոկայանի համար Շուշին, Վարանդան և օկուպացված այլ տարածքներ Ադրբեջան են

Հոկտեմբերի 26-ին Թուրքիայի նախագահ Ռեջեփ Թայիփ Էրդողանը գտնվում էր Արցախից օկուպացված Վարանդայի շրջանում, որտեղ Իլհամ Ալիևի հետ մասնակցում էր նոր կառուցված օդանավակայանի բացմանը:

Թեմային անդրադարձել էր նաև Հայաստանում մեծ լսարան ունեցող և Արևմուտքից սնվող «Ազատություն» ռադիոկայանը: Լրատվամիջոցը վաղուց հայտնի է իր «խաղաղասիրական», հետևաբար՝ հակահայկական մոտեցումներով:

Այսպես՝ հոկտեմբերի 26-ին «Ազատության» կայքում «Ֆիզուլիում Ալիևի և Էրդողանի մասնակցությամբ տեղի ունեցավ նորակառույց օդանավակայանի բացումը» վերնագրով հոդված է հրապարակվել, որում հերթական հակահայկական մոտեցումներ են տեղ գտել:

Նախ` նյութում Արցախից օկուպացված բոլոր շրջանները ներկայացվում են կեղծ` ադրբեջանական անուններով` Ֆիզուլի, Զանգիլան, Ջաբրայիլ, Լաչին (պետք է լիներ Վարանդա, Կովսական, Ջրական և Քաշաթաղ):

Այունուհետև` անդրադառնալով Էրդողանի այցին, լրատվամիջողը գրում է, թե թուրք ղեկավարը «ժամանել է Ադրբեջան»: Էրդողանը ժամանել էր ոչ թե Բաքու, այնտեղից էլ՝ Արցախի օկուպացված շրջաններ, այլ միանգամից՝ Վարանդա, հետևաբար, լրատվամիջոցի` «Էրդողանը ժամանել է Ադրբեջան» արտահայտությունը նշանակում է, որ Վարանդան համարում է Ադրբեջան:

Նույնը կարելի է ասել նաև բնակավայրերի ադրբեջանական կեղծ անունների կիրառման մասին:

«Ազատությունը» նաև Շուշին է համարել Ադրբեջանի մաս: Այսպես՝ նյութում նշվել է, որ՝ սա Էրդողանի երրորդ այցն է: Էրդողանը հուլիսին այցելել էր հայոց Շուշի բերդաքաղաք, և նման ձևակերպումն է նաև նշանակում, որ «Ազատության» հայկական մասնաճյուղը վերածվել է ադրբեջանական Azadlıq-ի` Շուշին համարելով ադրբեջանական: