Կառավարությունը չէ՞ մենաշնորհի չարաշահման գնահատողը

ՀՀ էկոնոմիկայի նախարար Կարեն Ճշմարիտյանը, այսօր ամփոփելով տարին, նշեց, որ նախատեսված ծրագրերից չեն հասցրել իրականացնել «Հայաստանի կայուն զարգացման մարտավարության» ծրագիրը, քանի որ այն շատ աշխատատար էր: Նա հավաստիացրեց, որ կառավարության բոլոր ջանքերն ուղղված են հենց աղքատության նվազեցմանը:

Ինչ վերաբերում է ԵՏՄ-ին ինտեգրվելու դեպքում Հայաստանին ոչ ձեռնտու քաղաքականության պարտադրմանը, նախարարը նշեց. «Որևէ երկրի հնարավոր չէ պարտադրել մի բան, որը այդ երկրին ձեռնտու չէ: Չի լինում այդպիսի բան»:

Լրագրողների այն հարցին` ինչո՞ւ Հայաստանում առաջին անհրաժեշտության և լայն սպառման մթերքները մի քանի անգամ ավելի թանկ են, քան Եվրոպայում, և արդյո՞ք աշխարհում կա երկրորդ այդպիսի երկիր, որի տնտեսությունը որակական զարգացում է ապրել` լինելով մոնոպոլիզացված ու օլիգոպոլ, Կարեն Ճշմարիտյանը նախ պատասխանեց, որ համեմատությունը Հայաստանի ու Եվրոպայի միջև տեղին չէ: Թեև կան օրինակներ, երբ մենաշնորհի առկայության պարագայում տվյալ երկրների տնտեսությունները զարգանում են:

Նախարարը նշեց, որ, մենաշնորհ ասելով, պետք է հաշվի առնել,  որ կա նաև պետական մենաշնորհ: «Խնդիրը մենաշնորհի գոյության մեջ չէ, այլ դրա չարաշահման»,- ասաց նա` պնդելով, որ մենաշնորհի գոյությունը չի արգելում տնտեսության զարգացմանը, մենաշնորհի չարաշահումը կարող է խոչընդոտել տնտեսության զարգացմանը:

Հարցին, թե արդյոք՞ կա մենաշնորհի չարաշահում Հայաստանում, նախարարը խուսափեց պատասխանել` ասելով, որ դրա մասին կառավարությունը չպետք է ասի կամ գնահատի, դրա մասին կարող է խոսել ու գնահատել Տնտեսական մրցակցության պետական հանձնաժողովը:

Նախարարը բերեց մի քանի պատճառներ, թե ինչու է Եվրոպայում մթերքը, օրինակ` բանանը, ավելի էժան, քան Հայաստանում: «Ուզում եք՞ մի 50 օրինակ բերեմ, թե ինչու է Եվրոպայում ավելի էժան: Բայց գնի վերաբերյալ մի գործոնով մի առաջնորդվեք, գնի վրա տարբեր գործոններ են ազդում»,- ասաց նա:

Նախարարը նաև նշեց, թե բանանն ու շոկոլադե կրեմը լայն սպառման ապրանքներ չեն, ինչին լրագրողները կեսկատակ-կեսլուրջ պատասխանեցին, որ, բնականաբար, նման թանկ գներով բանանն ու շոկոլադե կրեմը  չեն կարող լայն սպառման մթերք համարվել: