Դեղերի դրոշմապիտակավորումից հետո էլ հատավաճառը հնարավոր կլինի

Դեղերի դրոշմապիտակավորումից հետո հատավաճառ իրականացնելը կրկին հնարավոր կլինի: Այս մասին իր տարեվերջյան ամփոփիչ ասուլիսի ժամանակ հայտնեց ՀՀ առողջապահության նախարար Արմեն Մուրադյանը:

Նա նշեց, որ հատավաճառն օրենքով արգելվում է, և վաճառողներն իրականում օրենք են խախտում, սակայն, հաշվի առնելով սոցիալական պայմանները, այլ կերպ դեռևս ուղղակի անհնար է:

«Դրոշմապիտակավորումից հետո հատավաճառք իրականացնելու դեպքում վաճառողը պարտավոր է գնորդին ցույց տալ դեղի տուփը, տուփի վրայի դրոշմանիշը: Տեղեկացնեմ նաև, որ դեղերը դրոշմապիտակավորելուց հետո դրանց գինը կավելանա ընդամենը 4-8 դրամով»,-ասաց Մուրադյանը` նշելով, որ վերջին շրջանում դեղորայքի գինն էականորեն նվազել է, իսկ ինչ վերաբերում է որոշ դեղերի գնի` շուրջ 10 տոկոս աճին, ապա այդ դեպքերն ուսումնասիրվում են:

Նախարարի հավաստմամբ` բուժծառայությունների գները նույնպես չեն բարձրացել: