Մինչեւ տարեվերջ դեղերի մասին նոր օրինագիծ կլինի

Մեկնարկել է դեղագործության մրցունակության 4-րդ միջազգային համաժողովը, որը նվիրվել է Հայաստանի անկախության 20-ամյակին: Համաժողովի կազմակերպիչներն են ՀՀ առողջապահության, էկոնոմիկայի նախարարությունները և Հայաստանի դեղարտադրողների և ներմուծողների միությունը։

ՀՀ առողջապահության փոխնախարար Տիգրան Սահակյանը նշել է, որ Հայաստանն առաջինն է ԱՊՀ տարածաշրջանում, որ 1995թ., ընդունելով դեղերի մասին օրենքը, որդեգրեց Առողջապահության համաշխարհային կազմակերպության երաշխավորած դեղային քաղաքականության հիմնարար սկզբունքները և ներդրեց դեղերի հսկողության համակարգը:

«Մինչև տարեվերջ առողջապահության նախարարությունը կներկայացնի դեղերի մասին նոր օրենքի նախագիծ»,- ասաց փոխնախարարը:

Համաժողովի 2-րդ նիստը, որը կայանալու է վաղը, կրում է «Միջազգային լավագույն ձեռքբերումները դեղագործության ոլորտում» խորագիրը։ Հայաստանում գործող հեղինակավոր միջազգային դեղագործական ընկերությունների ներկայացուցչությունները կներկայացնեն իրենց փորձը, արտերկրից ժամանած աշխատակիցները զեկույցներ կկարդան` ներկայացնելով վերջին ձեռքբերումները, ապրանքատեսակները, տեխնոլոգիաները, գիտական հայտնագործությունները։