Նա, ով ցանկանում է ստեղծել ԽՍՀՄ, ընդհանրապես ուղեղ չունի. Նազարբաև

Ղազախստանի նախագահ Նուրսուլթան Նազարբաևը հայտարարել է, որ անհեթեթ է այն կարծիքը, թե  Եվրասիական տնտեսական միությունը նմանություն ունի ԽՍՀՄ-ի հետ: Այդ մասին նա ասել է լրագրողների հետ ամենամյա հանդիպման ժամանակ. գրում է timeskz.kz-ը:

«Այսօր ԵՏՄ-ն շատ մեծ ռիսկի է ենթարկվում ճգնաժամերի պատճառով։ Այժմ խոսակցություններ են շրջանառվում անկախության կորստի մասին, ու թե կրկին ստեղծվում է Խորհրդային միությունը։ Ուղղակի անհեթեթություն։ Նա, ով ցանկանում է ստեղծել Խորհրդային միություն, ընդհանրապես ուղեղ չունի։ Այն ժամանակ կար սահմանափակող Կոմունիստական կուսակցությունը, այժմ չկա: Կար միասնական տնտեսական օրգանիզմ, այժմ չկա»,- նշել է Ղազախստանի նախագահը։

Նազարբաևը 2014 թվականին Ղազախստանի համար կարևորագույն իրադարձություններից է համարում Աստանայում ԵՏՄ-ի մասին պայմանագրի ստորագրումը։