Ժողովուրդը պատասխաններ է պահանջում, այնինչ ԱԺ-ն նիստը դռնփակ է անցկացնում

ԱԺ-ում գումարվեց արտահերթ նիստ, որը նախաձեռնել էին ԲՀԿ, ՀԱԿ, ՕԵԿ, «Ժառանգություն» խմբակցությունները: Ստորագրահավաքին միացել են ՀՀԿ-ն և ՀՅԴ-ն:

Քվորում կա, ներկա է 105 պատգամավոր:

Վարման կարգով ելույթ ունեցավ «Ժառանգության» պատգամավոր Զարուհի Փոստանջյանը: «Պետք է նիստը բաց լինի, որ  մեր հանրությանը ներկայացնենք իրականությունը: Պետք է դադարեցնենք Հայաստանի բռնակցումը ԵՏՄ-ին, մեր շահերից է բխում Ռուսաստանի փլատակների տակ չմնալը»,- ասաց նա:

ԲՀԿ-ական Միքայել Մելքումյանն էլ նշց, որ ԲՀԿ-ն դեմ չէ դռնփակ անցկացնելուն:

Ըստ Նիկոլ Փաշինյանի` նիստը դռնփակ անցկացնելը ավելի կխորացնի սպեկուլյատիվ աժիոտաժը: «Մարդիկ պատասխաններ են պահանջում կառավարությունից, ԿԲ-ից: Այսօր տեսա, որ կառավարությունն ու ԿԲ-ն հայտարարություններ են տարածել, բայց, ըստ էության, որևէ բան չեն ասում: Ես դեմ եմ, որ նիստը դռնփակ անցկացվվի, դա ավելի կխորացնի ժողովրդի շրջանում աժիոտաժը»,- ասաց նա:

Քվեարկության դրվեց նիստը դռնփակ անցկացնելու հարցը: 6 պատգամավոր դեմ քվեարկեց, 75-ը` կողմ: ԱԺ նախագահը պահանջեց լրագրողներին ազատել օթյակները: Անջատեցին նաև ուղիղ միացումը: Այսպիսով` նիստը դռնփակ է և շարունակվելու է առանց ընդհատումների: