Հունվարին կորոշվի Հայաստանի` «Եվրիմաժի» անդամ դառնալու հարցը

Վերջերս Բրյուսելում քննարկվել է Հայաստանի` համատեղ կինոարտադրության և կինովարձույթի աջակցության «Եվրիմաժ» հիմնադրամի անդամ դառնալու հարցը:

Լրագրողների հետ զրույցում Հայաստանի ազգային կինոկենտրոնի տնօրեն Գևորգ Գևորգյանը նշեց, որ քննարկման ժամանակ բոլորը դրական են արտահայտվել, և իր կարծիքով` ոչինչ չի խանգարելու մեր` հունվարին «Եվրիմաժի» անդամ դառնալուն:

«Եվրիմաժը» եվրոպական ամենամեծ ֆինանսավորող կառույցն է, և այն ֆինանսական մի շարք հարցեր կլուծի: Բացի այդ` բոլոր այն երկրները, որոնք «Եվրիմաժի» անդամ են, համատեղ արտադրության հնարավորություն ունեն»,- ասաց Գևորգյանը:

Ըստ նրա` «Եվրիմաժ»-ին Հայաստանի անդամակցության կապակցությամբ արդեն երկու տարի է, ինչ բանակցություններ են վարում: