Փետրվարի 9-ին կորոշվի Նարեկ Մանթաշյանի կալանավորման վերացման կամ պահպանման հարցը

Փետրվարի 9-ին, ժամը 16:30-ին, Կենտրոնի նստավայրում, Կարեն Ֆարխոյանի նախագահությամբ սկսվում է «Դրոշի գործի» դատավարությունը: Այս մասին գրել է Նարեկ Մանթաշյանի փաստաբան Ալեքսանդր Կոչուբաևը:

«Այդ դատական նիստում քննվելու է «Այլընտրանք» ՀԿ համանախագահ, «Հայաստան» դաշինքի անդամ Նարեկ Մանթաշյանի կալանավորման վերացման կամ պահպանման հարցը:

Դատական նիստը դռնբաց է»,- գրել է նա:

Հիշեցնենք, որ Մանթաշյանը կալանավորվել էր 2021 թվականի դեկտեմբերի 15-ին: Նրա պաշտպան Ալեքսանդր Կոչուբաևը նշել էր, որ դեռևս մեկ տարի առաջ Մանթաշյանին կալանավորելու միջնորդություն էր ներկայացվել, սակայն դատարանն արձանագրել էր, որ բացակայում է հիմնավոր կասկածը։ Փաստաբանը ասել էր, որ ԱԱԾ վարկածով ՀՀ պետական դրոշը կառավարության շենքում ծածանելը որակվել է որպես կողոպուտ։ Կուչաբաևի համոզմամբ սա իրավական գործընթաց չէ, այլ քաղաքական մոտիվներով հետապնդում է։

Նարեկ Մանթաշյանին մեղադրանք է առաջադրվել ՀՀ ՔՕ 225-րդ հոդվածի 1 -ին և 2-րդ մասերով։