Արմեն Երիցյանն անտրամադիր էր եւ շփոթված. ո՞վ կնշանակվի նոր նախարար

Արտակարգ իրավիճակների նախարար Արմեն Երիցյանը միայն այսօր է իմացել, որ իր ղեկավարած նախարարությանը միանում է նաև տարածքային կառավարման նախարարությունը:

Միշտ բարձր տրամադրությամբ աչքի ընկնող նախարարն այսօր անտրամադիր էր: Հարցին` եթե իրեն առաջարկեն ղեկավարել միավորված նախարարությունը, կհամաձայնի՞, պատասխանեց. «Կմտածեմ: Եթե մեզ հանձնարարեն, մենք կղեկավարենք, եթե` ոչ, ուրեմն` ոչ»:

Հարցին, թե որքանո՞վ են համատեղելի այդ երկու նախարարությունները, նախարարը պատասխանեց. «Կարծում եմ, որ համատեղելի են, որովհետև արտակարգ իրավիճակների նախարարությունն իր գործառույթները լավ կատարում էր, և միացումից հետո համատեղ աշխատանքները էլ ավելի լավ կկատարվեն: Հիմնականում փրկարարներն աշխատում են մարզերում՝ հիդրոմետ, սեյսմիկ ծառայությունները, մշտապես համագործակցում են»:

Լրագրողները հետաքրքրվեցին, թե միայն Արմեն Գևորգյանի գնալուց հետո՞ է պարզվել, որ նախարարությունների միավորված կառավարումն ավելի արդյունավետ կլինի: Նախարարն ասաց. «Ես չգիտեմ, թե դա երբ է պարզվել»: