Մուրադ Ջանիբեկյանը Լեհաստանի թատերական փառատոնից «Գրան պրի»-ով է վերադարձել

ՀՀ վաստակավոր արտիստ Մուրադ Ջանիբեկյանը և դերասան Արա Գևորգյանը մասնակցել են Լիտվայում կայացած «Ատսպինդիս» միջազգային թատերական IX փառատոնին: Ջանիբեկյանը հանդես է եկել «Խոստովանություն» /ըստ Միշել դե Գելդերոդեի/, իսկ Ա. Գևորգյանը՝ «Ծխախոտի վնասի մասին» /ըստ Ա. Չեխովի/ մոնոներկայացումներով:

«Ատսպինդիս» փառատոնին այս տարի մասնակցել է 10 երկիր /Ֆինլանդիա, Գերմանիա, Ֆրանսիա, Լեհաստան, Ռուսաստան, Հայաստան և այլն/, ցուցադրվել է 12 ներկայացում: Հայաստանը փառատոնին մասնակցել է 4-րդ անգամ: Փառատոնի շրջանակներից դուրս՝ Վիլնյուսում հայ դերասանները ներկայացումներով հանդես են եկել նաև հայ համայնքի համար:

Մուրադ Ջանիբեկյանը նույն մոնոներկայացումով հանդես է եկել նաև Վրոցլավի (Լեհաստան) հեղինակավոր «Վրոստյա» 49-րդ մոնոներկայացումների միջազգային թատերական փառատոնում և արժանացել «Գրան պրի» մրցանակի:

«Վրոստյա» փառատոնում այս տարի ցուցադրվել է 10 ներկայացում՝ 10 երկրից, այդ թվում՝ ԱՄՆ, Ալժիր, Հայաստան, Իսպանիա, Հունաստան: Հայաստանը փառատոնին մասնակցել է 13-րդ անգամ:

Փառատոների շրջանակներում անցկացվել են թատերական քննարկումներ, ինչը մասնագիտական շփումների, գաղափարների, կարծիքների փոխանակման լավագույն հարթակն է: