Ոստիկանությունում նոր նշանակումներ կլինե՞ն

Ինչպես և սպասվում էր, Աղվան Հովսեփյանը քննչական կոմիտեն համալրեց իր կադրերով, մասնավորապես` ՀՀ գլխավոր դատախազ Գևորգ Կոստանյանի հրամանով աշխատանքից ազատված դատախազներով: Նշենք, որ այս ընթացքում ոստիկանությունում նախկինում աշխատած քննիչներից քննչական կոմիտում տարբեր պատճառներով չեն նշանակվել 38-ը, այդ թվում` քննիչներ, վարչության պետեր: Նրանցից Արսեն Այվազյանը, ով մինչև վերջերս զբաղեցնում էր քննչական գլխավոր վարչության հատկապես կարեւոր գործերի քննության վարչության բաժնի պետի պաշտոնը, ՀՀ ոստիկանապետ Վլադիմիր Գասպարյանի հրամանով նշանակվեց ոստիկանության Արմավիրի վարչության պետ: Մինչ այդ` նախքան կոմիտեում իրականացվող նշանակումները, Լոռու մարզի քննչական բաժնի պետ Կարեն Հակոբյանն ազատվեց զբաղեցրած պաշտոնից և ոստիկանապետի մեկ այլ հրամանագրով նշանակվեց ոստիկանության Իջևանի բաժնի պետ:

Այսօր Yerkir.am-ի լրագրողն այս կապակությամբ ՀՀ ոստիկանապետի տեղակալ Հունան Պողոսյանից հետաքրքրվեց` հնարավո՞ր է անգործ մնացած 38 քննիչները Արսեն Այվազյանի օրինակով տեղ գտնեն ոստիկանական համակարգում, և առհասարակ, նոր նշանակումներ սպասվո՞ւմ են:

«Մենք դա չենք բացառում, բայց դա մեզ մոտ կատարվող նշանակումների հետ կապված չէ: Դուք ականատես եք ոստիկանությունում կատարվող կադրային քաղաքականությանը, շատ հաճախ դուք մեզնից շուտ եք հիմանում այդ նշանակումների մասին, որովհետև մենք, իրոք, բաց ենք աշխատում»,- ասաց նա և, անդրադառնալով քննչական կոմիտեում կատարվող փոփոխություններին, հավելեց. «Բնականաբար, նոր ղեկավոր է, նոր կադրեր պետք է ընտրի,  և կադրերի ընտրության հարցը թողնում ենք իրենց, իսկ մեր տեսադաշտում հայտնված բոլոր բանիմաց կադրերին, ովքեր իրենց բարոյական, մասնագիտական գիտելիքներով բավարարեն ներկայացված պահանջներին, բնականաբար, կնշանակենք համապատասխան պաշտոններում»: