ԵՏՄ-ում հայաստանյան դատաիրավական համակարգի համար հեռանկար չկա

ՀՀ նախագահի հետ հանդիպման ժամանակ ԵԽ Մարդու իրավունքների հանձնակատար Նիլս Մուիժնիկսն ասել է, որ հայաստանյան դատաիրավական համակարգում դրական առաջընթաց նկատվում է: «Սակայն դեռևս արդյունքները բավարար չեն»,- այսօր` հանրային քննարկման ժամանակ, ասաց Հայաստանի Հելսինկյան կոմիտեի նախագահ Ավետիք Իշխանյանը:

Դատաիրավական բարեփոխումների` 2012-2016 թվականների ծրագիրը շարունակվում է, գրանցվել են որոշակի արդյունքներ: Բանախոսներից` «Իրավունքի պաշտպան առանց սահմանների» ՀԿ նախագահ Հայկուհի Հարությունյանը հավելեց, որ դեռևս, ցավոք, այդ բարեփոխումների ազդեցությունը կոնկրետ անհատի վրա չի նկատվում, դրական առումով տեղաշարժ կա'մ չի արձանագրվել, կա'մ շատ փոքր է:

Իսկ ի՞նչ հեռանկար կարող է լինել դատաիրավական համակարգի զարգացման համար, եթե Հայաստանն անդամակցի Եվրասիական տնտեսական միությանը: Բանախոսները նշեցին, որ այս ոլորտում Հայաստանն առաջատար է` Ռուսաստանի, Ղազախստանի և Բելառուսի հետ համեմատությամբ: Սակայն, հաշվի առնելով, որ դա քաղաքական կառույց է, հազիվ թե այդ երկրների շարքում Հայաստանը որպես օրինակ ծառայի:

Սոֆյա Ստեփանյան