Քննարկում ենք, թե առաջնորդները որ պահին են միանալու հանրահավաքին. ԲՀԿ-ական

Երկուս ու կես ժամ տևած հանդիպումից հետո ավարտվեց եռյակի` ՀԱԿ-ի, ԲՀԿ-ի և «Ժառանգության» պատգամավորների նիստը:

Նիստից հետո ԲՀԿ խմբակցության պատգամավոր Ստեփան Մարգարյանը, պատասխանելով հարցին, թե եռյակի կուսակցությունների առաջնորդները մասնակցելո՞ւ են հոկտեմբերի 10-ին կայանալիք համապետական հանրահավաքին, ասաց, որ իրենք նիստի ժամանակ քննարկել են այդ հարցը: «Այն, որ լիդերները լինելու են հանրահավաքին, միանշանակ է: Մենք այս պահին քննարկում ենք, թե առաջնորդները որ պահին են միանալու հանրահավաքին: Չի բացառվում, որ ամսի 10-ին մասնակցեն, և չի էլ բացառվում, որ հետո մասնակցեն, քանի որ հանրահավաքը մեկը չէ, այն էլի է լինելու»,- ասաց պատգամավորը:

Նա նշեց, որ նիստի ժամանակ իրենք քննարկել են վաղը Գյումրիում կայանալիք հանրահավաքին վերաբերող կազմակերպչական հարցեր:

«Քննարկել ենք 12 կետերի վերաբերյալ քառյակի հայտարարությունը, որը հրապարակվելու է հանրահավաքի օրը»,- ասաց Ստեփան Մարգարյանը և հավելեց, որ անդրադարձել են հոկտեմբերի 10-ին կայանալիք հանրահավաքի կազմակերպչական և քաղաքական օրակարգի վերաբերյալ հարցերի:

Ի դեպ, Ստեփան Մարգարյանը նշեց, որ քաղաքական օրակարգին վերաբերող մի շարք հարցեր դեռ քննարկման կարիք ունեն, որն իրենք կավարտեն հոկտեմբերի 9-ին սպասվող` եռյակի հերթական նիստի ժամանակ: