Ինչո՞ւ ՀԱԿ-ի, ԲՀԿ-ի և "Ժառանգության" առաջնորդները կարծիք չհայտնեցին "գազային" համաձայնագրերի մասին

Այսօր ՀՀԿ խոսնակ Էդուարդ Շարմազանովը լրագրողների հետ հանդիպման ժամանակ պատասխանել  է ընդդիմադիր պատգամավորների այն որակումներին, ըստ որոնց`  «գազային» պայմանագրին կողմ  քվեարկողները դավաճան են:  ՀՀԿ խոսնակը նշեց, որ երբ ընդդիմության քննադատությունները փաստ չեն պարունակում, դա նմանվում է մանկապարտեզի:

Մեջբերելով որոշ քաղաքական կուսակցությունների` ԲՀԿ-ի, «Ժառանգությանը», ՀԱԿ-ի որակումները, որ կործանարար պայմանագրերին կողմ քվեարկողները պետք է ենթարկվեն քրեական պատասխանատվության, նա հարց ուղղեց այդ կուսակցություններին. «Եթե այդքան կործանարար էին այդ պայմանագրերը, բա ո՞ւր էին ձեր կուսակցությունների ղեկավարները: Եթե  ԲՀԿ ղեկավարը նույն օրը կամ մեկ օր հետո ֆիզկուլտինստիտուտում ելույթ է ունենում, բայց խորհրդարանում չի մասնակցում «կործանարար» պայմանագրի քննարկմանը ու ելույթ չի ունենում, ուրեմն դա այդքան էլ կործանարար չէ: ԲՀԿ-ն չի կարող ընդդիմություն լինել»: Շարմազանովը հավելեց, որ ՀԱԿ առաջնորդ Լևոն Տեր-Պետրոսյանն էլ ամեն ինչից խոսեց, բացի «գազային» համաձայնագրերից: Նույն կերպ «Ժառանգություն» կուսակցության առաջնորդ Րաֆֆի Հովհաննիսյանը մինչ օրս որևէ կարծիք չի հայտնել այդ համաձայնագրերի վերաբերյալ:

«Ազնիվ չէ 1-ից 5-ը լինել արևմտամետ, 5-ից 7-ը` ռուսամետ, այնուհետ` իշխանամետ»,- ասաց նա` նշելով, որ ընդդիմության վարկանիշի անկման հետևանքով երկրում առաջանում են նոր քաղաքական ուժեր: