Ժողովուրդը չէր հասկանա. թե ինչու է ԲՀԿ-ն կողմ քվեարկել «Շրջանառության հարկի մասին» աղմկահարույց օրենքին

Այսօր` խորհրդարանական ճեպազրույցների ժամանակ, ԱԺ ԲՀԿ խմբակցության պատգամավոր Միքայել Մելքումյանը, պատասխանելով լրագրողների այն հարցին, թե ինչո՞ւ է ԲՀԿ-ն հունիս ամսին կողմ քվեարկել «Շրջանառության հարկ մասին» ՀՀ օրենքում փոփոխություններ կատարելու վերաբերյալ օրինագծին, իսկ հիմա դեմ է արտահայտվում նույն օրենքին, նշեց, որ օրենքն ունի երկու բաղադրիչ, իսկ ԲՀԿ-ն կողմ է եղել, որ հարկային բեռը նվազի:

«Մենք չենք կարող բեռի իջեցմանը դեմ լինել: Պայմանով ենք կողմ քվեարկել: Ժողովուրդը չէր հասկանա, եթե մենք դեմ քվեարկեինք, որովհետև կստացվեր, որ մենք դեմ ենք հարկային բեռի նվազեցմանը: Պայմանով ենք կողմ քվեարկել, որ երկրորդ ընթերցման ժամանակ հաշվի առնվեն մեր առաջարկությունները, բայց դրանք հաշվի չառնվեցին, և մենք երկրորդ ընթերցման ժամանակ չմասնակցեցինք, բոյկոտեցինք»,- ասաց Միքայել Մելքումյանը:

Yerkir.am-ի այն հարցին, թե ինչո՞ւ ձեռնպահ չեն քվեարկել օրենքին, ինչպես, օրինակ, ՀՅԴ-ն եւ ՀԱԿ-ը, կամ, գուցե կողմ քվեարկելով, ԲՀԿ-ն չի կանխատեսել օրենքի պրակտիկ կիրառման խնդիրները, պատգամավորը պատասխանեց, որ լավ էլ կանխատեսել են խնդիրները: «Կանխատեսումներ մենք արել ենք, բարձրաձայնել ենք մեր մտահոգությունների մասին, բայց չէր հասկացվի ժողովրդի կողմից, եթե մենք դեմ քվեարկեինք հարկային բեռի նվազեցմանը»,- ասաց նա: