ՀՀԿ-ականները դեմ են քվեարկել կառավարության բերած օրենքին

«Ակցիզային հարկի մասին» օրենքի քննարկումը և առաջին ընթերցմամբ քվեարկությունը անցան բուռն ու հակասական մթնոլորտում: Բանն այն է, որ կառավարության ներկայացրած` օղու, ծխախոտի ու դիզվառելիքի թանկացումներ ենթադրող նախագծի քվեարկության ընթացքում ուշագրավ քվեարկություններ են արձանագրվել:

ԱԺ պատգամավոր, գործարար Շինանյութի Սերգեյի փեսան՝ Կարեն Բոթոյանը, կողմ է քվեարկել օրենքին: ՀՀԿ-ական պատգամավոր, խմիչքների արտադրությամբ զբաղվող Արայիկ Գրիգորյանը՝ Ավշարի Արայիկը, դեմ է քվեարկել օրենքին: ԱԺ սոցիալական հարցերի մշտական հանձնաժողովի նախագահ, ՀՀԿ-ական Հակոբ Հակոբյանը եւս դեմ է քվեարկել օրենքին: Հիշեցնենք, որ երեկ օրենքի քննարկման ժամանակ նա դեմ էր արտահայտվել օրենքին: Սակայն մեկ այլ ՀՀԿ-ական, ով դեմ էր արտահայտվել օրենքին, ԱԺ տնտեսական հարցերի մշտական հանձնաժողովի նախագահ Վարդան Այվազյանը, նախընտրեց առհասարակ չմասնակցել քվեարկությանը:

Նշենք, որ օրենքի քվեարկության ժամանակ շատ խառն է եղել ՀՀԿ-ական Սամվել Ալեքսանյանը, ով եւս նախընտրեց չմասնակցել քվեարկությանը: