7 950 000 դրամ. ո՞ր ստեղծագործողի աշխատանքներն է այս տարի գնել մշակույթի նախարարությունը

Արդեն երկու տարի է' ՀՀ մշակույթի նախարարությունը վերսկսել է «Կերպարվեստի աշխատանքների գնում» ծրագիրը. նախարարությունը պետբյուջեից հատկացված որոշակի գումարի դիմաց տարվա ընթացքում գնում է նկարներ և քանդակներ:

Yerkir.am-ի գրավոր հարցմանն ի պատասխան` ՀՀ մշակույթի նախարարությունից տեղեկացրին, որ նախարարության կողմից գեղանկարչական աշխատանքները ձեռք են բերվում թանգարանների կողմից ներկայացված առաջարկությունների հիման վրա' թանգարանային ֆոնդերի համալրման նպատակով, հոբելյանական և այլ ծրագրերի շրջանակներում: Գործընթացն իրականացվում է թանգարանային կազմակերպությունների գնահատման հանձնաժողովների առաջարկների և եզրակացությունների հիման վրա:

Այսպիսով' ծրագրի իրականացման համար 2013-ին նախատեսվել է 7 290 000 դրամ, ըստ որի' գնվել է 4 աշխատանք:

1. «Ժամանակակից արվեստի թանգարան» ՀՈԱԿ-ի հիմնական հավաքածուն համալրելու համար' նկարիչ Գաբրիել Մանուկյանի «Ամեն օր»  գեղանկարչական աշխատանքը /2 500 000 դրամ/:

2.  Գյումրու Սերգեյ Մերկուրովի անվան նկարչական դպրոցի վերականգման  համար'  Հայաստանի նկարիչների միության ցուցասրահում բարեգործական ցուցահանդես-վաճառքից' Սամվել Սեւադայի «Անդրադարձումներ» գեղանկարչական աշխատանքը /290.000 դրամ/:  Հանձվել է «Ցուցահանդեսային կենտրոն»  ՊՈԱԿ-ի ֆոնդին:

3. Հայաստանի ազգային պատկերասրահի ֆոնդերը համալրելու համար` ՀՀ ժողովրդական նկարիչ, քանդակագործ Խաչատուր Իսկանդարյանի 90-ամյա հոբելյանին նվիրված միջոցառումների շրջանակներում' Խաչատուր Իսկանդարյանի «Գեղանկարիչ Ռաֆայել Շիշմանյան» քանդակը /2 000 000 դրամ/:

4. «Գյումրին ԱՊՀ մշակութային մայրաքաղաք-2013 թ.» ծրագրի շրջանակներում' Գյումրի քաղաքին նվիրված` քանդակագործ Ֆերդինանդ Առաքելյանի ֆոլկլորային «Բարեկամություն»  քանդակը  /2 500 000 դրամ/:

2014-ին նախարարությանն է տրամադրվել 7 950 000 դրամ, և արդեն գնվել է 3 աշխատանք`

1. «Ցուցահանդեսային կենտրոն» ՊՈԱԿ-ի ֆոնդերը համլրելու համար` Երվանդ Քոչարի 115-ամյակին նվիրված միջոցառումների շրջանակներում' Ա. Արամյանի «Երվանդ Քոչար» քանդակի բրոնզե տարբերակի ձեռքբերում /2 000 000 դրամ/:

2. «Ցուցահանդեսային կենտրոն» ՊՈԱԿ-ի ֆոնդերը համալրելու համար` ՀՀ նկարիչների միության անդամ, գեղանկարիչ Գագիկ Աբրահամյանի  65-ամյակին նվիրված միջոցառումների շրջանակներում' Գագիկ Աբրահամյանի  «Ձմեռը Եղեգնաձորում» գեղանկարի ձեռքբերում /1 000 000 դրամ/:

3.  «Հայ Ձմեռ պապ» բարեգործական հիմնադրամի' «Արվեստը սահմանին» խորագրով բարեգործական ցուցահանդես-վաճառքից' գեղանկարիչ Տ.Ասատրյանի «Պիերո» գեղանկարի ձեռքբերում /450 000 դրամ/: Հանձնվել է «Ցուցահանդեսային կենտրոն» ՊՈԱԿ-ի ֆոնդին:

Բացի սրանցից, ընթացիկ տարում նախատեսվում է գնել  ևս երեք աշխատանք' «Ժամանակակից արվեստի թանգարան» ՀՈԱԿ-ի հիմնական հավաքածուն համալրելու համար գեղանկարիչ Արկո Բաղդասարյանի «Հին հիշողություններ» գեղանկարն /1 500 000 դրամ/ ու  «Ցուցահանդեսային կենտրոն» ՊՈԱԿ-ի ֆոնդերը համալրելու համար գեղանկարիչ Վան Խաչատուրի 2 ստեղծագործությունները /3 000 000 դրամ/: