Ավագ դպրոցներում կներդրվի կրեդիտային համակարգ

Առաջիկայում նախատեսվում է ավագ դպրոցներում կրեդիտային համակարգ ներդնել. լրագրողների հետ հանդիպման ժամանակ հայտարարեց ՀՀ ԿԳ նախարար Արմեն Աշոտյանը: Նախարարը նշեց, որ այս որոշման համար հիմք է հանդիսացել բուհերում կրեդիտային համակարգի ներդրման հաջող փորձը:

«Սա նշանակում է, որ որոշակի առարկաներից բուհը կրեդիտներ կարող է վերցնել նաև դպրոցից: Կրեդիտային համակարգի ներդրումն ավագ դպրոցներում չի բացառում նաև այն, որ կունենանք որոշակի փոփոխություններ ընդունելության քննությունների համակարգում: Այնուամենայնիվ, այս համակարգում հեղափոխությունը հակացուցված է»,- ասաց Աշոտյանը:

Նախարարը նշեց նաև, որ ավագ դպրոցներում առկա առաջին խնդիրը կարգապահական ռիսկն է: Խնդիրն այն է, որ կրկնուսույցները աշակերտների հետ պարապում են առավոտյան ժամերին, և աշակերտները ստիպված են լինում դպրոց չհաճախել: Նախարարը վստահեցրեց` այս տարի հատուկ ուշադրություն է դարձվելու դպրոցներում հաճախելիությանը: