Հակառակորդը կրկին գնդակոծում է Մովսես, Չինարի, Այգեպար, Ներքին Կարմիրաղբյուր գյուղերը

Այսօր հակառակորդը ինտենսիվ գնդակոծության է ենթարկել Տավուշի մարզի  Մովսես, Չինարի, Այգեպար, Ներքին Կարմիրաղբյուր գյուղերը: Yerkir.am-ի հետ զրույցում Մովսեսի գյուղապետ Արարատ Ավալյանը նշեց, որ առավոտից էին սկսել կրակել, պարբերաբար կրակում էին, սակայն ժամը 21-ից սկսած սկսել են կրակել խոշոր տրամաչափի գնդացիրներից:

Նա նշեց, որ այս պահին բոլորը պատսպարված են տներում, վնասի չափերի մասին դեռևս տեղեկություն չկա:

«Հայկական կողմը պատասխան կրակ է բացել, բայց դե հակառակորդն իր արածն անում է էլի: Կրակում է անմիջապես գյուղի տների վրա, հենց գյուղի կենտրոնական մասի ուղղությամբ»,- ասաց Արարատ Ավալյանը:

Չինարի գյուղապետ Սամվել Սաղոյանը նույնպես նշեց, որ գյուղը այսօր երեկոյան ենթարկվել է ինտենսիվ գնդակոծության:

«Գյուղս ավիրեցին»,- ասաց Չինարի գյուղապետը՝ հավելելով, որ թեև կրակում են, բայց ինքը  շտապում է, դեպք է պատահել գյուղում, որը կրակոցների հետ կապ չունի: