Լուսանկարիչ Յուրի Գարմաշը Մայդանում զոհված Սերգեյ Նիգոյանի նկարները կփոխանցի նրա ընտանիքին

«Ոսկե ծիրան» կինոփառատոնի շրջանակներում Հայաստանում է գտնվում լուսանկարիչ Յուրի Գարմաշը: Ի դեպ, «Մոսկվա» կինոթատրոնում բացվել է Գարմաշի` Փարաջանովի լուսանկարների ցուցահանդեսը:

Yerkir.am-ի հետ զրույցում Գարմաշն ասաց, որ Ուկրաինայում տեղի ունեցող իրադարձությունները նույնպես լուսանկարել է. Մայդանում նկարած 5000-ից ավելի լուսանկարներ ունի:

«Մայդանում հերթական լուսանկարներին էի անում, երբ ծանոթացա Ուկրաինայի քաղաքացի, բայց ազգությամբ հայ Սերգել Նիգոյանի հետ /նա զոհվել էր հենց Մայդանում/: Չեմ հիշում` երևի տղայի մահից մեկ ամիս առաջ էր, որ լուսանկարեցի նրան, սակայն այդ նկարները, ցավոք, այդպես էլ չկարողացա փոխանցել նրան: Նա շատ խիզախ տղա էր, ափսոս»,-ասաց լուսանկարիչը:

Գարմաշը նշեց նաև, որ առաջիկայում պատրաստվում է Նիգոյանի ընտանիքին նվիրել տղայի նկարը: