Իսրայելի անկախության օրվա արարողությունը` ֆիլմի տեսքով

Իսրայելցի կինոռեժիսոր Ավի Վայսբլայի «Արարողություն» ֆիլմն ընդգրկված է «Ոսկե ծիրան» կինոփառատոնի «Միջազգային վավերագրական մրցույթ» անվանակարգում:

Լրագրողների հետ հանդիպման ժամանակ կինոռեժիսորը նշեց, որ ֆիլմն 80-ամյա գնդապետի մասին է, ով Իսրայելի անկախության օրը հրամանատարն է լինելու, սակայն դեպքերի բերումով ամեն ինչ իրար է խառնվում:

«Իսրայելն այնքան էլ արարողություններ չունի` Բանակի և Անկախության տոները, որոնք պետականորեն են նշվում, դրանք էլ այնքան լավ չեն կազմակերպվում: Ֆիլմը պատմում է այն մասին, թե ինչպիսին է դառնում քաղաքն այդ օրերին: Փորձել ենք գնդապետի պատմության միջոցով ներկայացնել, թե ինչպես է Անկախության տոնն անցնում մարդկանց միջով, այսինքն`այն ոչ միայն տոնի անցկացման մասին է, այլև մարդկանց»,- ասաց կինոռեժիսորը:

Ըստ նրա` Անկախության տոնը միակ օրն է Իսրայելում, որը քաղաքացիական տոն է, մնացածը կրոնական տոներ են:

Ֆիլմում, Վայսբլայի տեղեկացմամբ, ներկայացվում են նաև զինվորական կյանքի լավ և վատ կողմերը: