Անկախության հռչակագրի հեղինակը հստակ գիտակցում էր անկախության արժեքը սնուցող երակները. Նիկոլ Աղբալյանի ծննդյան 150-ամյակին

Խ. Աբովյանի անվան հայկական պետական մանկավարժական համալսարանի Համաշխարհային պատմության և նրա դասավանդման մեթոդիկայի ամբիոնի վարիչ, պատմական գիտությունների դոկտոր, պրոֆեսոր Խաչատուր Ստեփանյանի անդրադարձը նվիրված է Նիկոլ Աղբալյանի ծննդյան 150֊ամյակին.

«Նիկոլ Աղբալյան. 150-ամյակը և պետականության դասերը

Լրացավ մեծանուն հայորդի, Հայաստանի Առաջին Հանրապետության հիմնադիր հայրերից, գրականագետ և անվանի պետական գործիչ Նիկոլ Աղբալյանի ծննդյան 150-ամյակը։

Աղբալյանը, որպես Առաջին Հանրապետության Հանրային կրթության և արվեստի նախարար, իր մեծ ներդրումն ունեցավ ազգային արժեհամակարգի պահպանման և զարգացման գործում։

Աղբալյանի համոզմամբ՝

• Պետությունը ազգային տունն է, որտեղ պետք է ապահով լինի մեր հոգևոր-ազգային ինքնությունը։

• Կենսունակ պետության հիմքը ազգային նպատակների շուրջ համախմբված գիտակից հասարակությունն է։

• Միայն կրթված և ինքնագիտակից սերունդն է ունակ պաշտպանելու, զարգացնելու և շարունակելու պետականաշինությունը։

• Կարևորագույնը Մարդ-քաղաքացին է, որը կառչած է իր արմատներին, քաջ գիտակցում է իր իրավունքներն ու պարտականություններն առ պետություն։

Անկախության հռչակագրի հեղինակը հստակ գիտակցում էր անկախության արժեքը սնուցող երակները՝ ազգային գաղափարախոսություն, պահանջատիրություն և համախմբվածություն։

Հայաստանի և հայության ապագան Աղբալյանի և նրա նմանների դավանանքին հետևելն է։ Նրա գաղափարները, որոնք կարևորում են կրթությունը, արմատներին հավատարմությունը և ազգային ոգու ամրությունը, մեր պետականության ամուր հիմքն են։

Հարգանքի տուրք մեծ մտավորականին և պետականաշինարարին»։